388.4
Գ. Պետրոսյան. «Հայ-թուրքական արձանագրությունները մեկն են այն 166 միջազգային պայմանագրերից, որոնք վերադարձել են Թուրքիայի խորհրդարան»
2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Թուրքական մամուլը Թուրքիայի նախարարների խորհրդի որոշումը' խորհրդարանի օրակարգ վերադարձնել Հայ-թուրքական արձանագրությունները, որակեց որպես «քայլ' ուղղված Հայաստանին»: Այս մասին «Արմենպրես»-ի հետ զրույցում հայտնեց թուրքագետ Գեւորգ Պետրոսյանը' հավելելով, որ նախարարների խորհրդի որոշումն իրականում միայն հայ-թուրքական արձանագրություններին չի վերաբերում, քանի որ խորհրդարանի օրակարգ են վերադարձվել 166 միջազգային պայմանագրեր ու համաձայնագրեր:
«Այդ պայմանագրերն ու համաձայնագրերը ժառանգություն էին մնացել դեռեւս Թուրքիայի նախկին խորհրդարանից, որոնք սպասել էին ազգային մեծ ժողովի վավերացմանը: Այժմ Թուրքիան արտաքին քաղաքականությունում լուրջ խնդիրների առջեւ է կանգնած, որոնց թվում են հարաբերություններն Իրանի, Սիրիայի, Կիպրոսի ու Իսրայելի հետ: Ելնելով այդ հանգամանքից' Թուրքիային ձեռնտու չէ եւս մեկ տարածաշրջանային լարվածություն»,- նշեց Գ. Պետրոսյանը' հավելելով, որ այդ ենթատեքստով էլ պայմանավորված' Թուրքիայի նախարարների խորհուրդը որոշում կայացրեց մյուս պայմանագրերի ու համաձայնագրերի հետ միասին խորհրդարան վերադարձնել նաեւ հայ-թուրքական արձանագրությունները:
«Միաժամանակ հարկավոր է ընդգծել, որ Թուրքիան խուսափում է դիմել կտրուկ քայլերի ու վերջնականապես «թաղել» արձանագրությունները: Դրանք ուղարկելով խորհրդարան' պաշտոնական Անկարան միջազգային ասպարեզում հնարավորություն է ստանում նորից մանեւրելու»,- ասաց Գ. Պետրոսյանը:
Բաժանորդագրվեք մեր ալիքին Telegram-ում
