Ստեփանակերտը ողջունում է Ուրուգվայի նախաձեռնությունը
2 րոպեի ընթերցում
![Ստեփանակերտը ողջունում է Ուրուգվայի նախաձեռնությունը](http://armenpress.am/resized/480/static/news/b/2011/09/663121.jpg)
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: Ստեփանակերտը ողջունում է Ուրուգվայի նախաձեռնությունը: Ինչպես հաղորդում է «Արմենպրես», այդ մասին հայտարարել է ԼՂՀ նախագահի աշխատակազմի տեղեկատվական գլխավոր վարչության պետ Դավիթ Բաբայանը ռուսական «Նեզավիսիմայա գազետա»-ին տված հարցազրույցում:
«Ողջունում ենք Ուրուգվայի մտադրությունը Արցախի անկախությունը ճանաչելու մասին: Ալմագրոյի խոսքերը չեն նշանակում անկախության ավտոմատ ճանաչում, այլ նշանակում են, որ միջազգային հանրությունը լուրջ է վերաբերում ԼՂՀ անկախության ճանաչման գործընթացին, որովհետեւ նոր պետությունների ճանաչման փուլը, որը սկսվել է Կոսովոյով, շարունակվում է Հարավային Օսիայով, Աբխազիայով, Հարավային Սուդանով, չի կարող շրջանցել Ղարաբաղը», -ասել է Դ. Բաբայանը' կարծիք հայտնելով, որ ԼՂՀ անկախության ճանաչումը կարող է ունենալ երկու հետեւանք' Ադրբեջանը եւ Թուրքիան կսկսեն «հիստերիկ» քաղաքականություն վարել Ուրուգվայի նկատմամբ: Եվ նաեւ այն, որ միջազգային հանրությունը, հատկապես Հարավային Ամերիկայի պետությունները, ավելի լուրջ կվերաբերվեն ԼՂՀ խնդրին:
Նշենք, որ Լեռնային Ղարաբաղի հարցի վերաբերյալ օրերս անակնկալ հայտարարությամբ էր հանդես եկել Ուրուգվայի արտաքին գործերի նախարար Լուիս Ալմագրոն: Ուրուգվայի խորհրդարանում Հայաստան-Ուրուգվայ հարաբերություններին նվիրված համաժողովի ժամանակ նա հայտարարել էր, որ Լեռնային Ղարաբաղը պետք է լինի անկախ եւ ժամանակի ընթացքում միանա Հայաստանին: «Դա հարցի լուծման միակ ճանապարհն է: Ղարաբաղը Հայաստանի պատմական մասն է եւ Ուրուգվայը պետական մակարդակով կքննարկի Լեռնային Ղարաբաղի հանրապետության ճանաչման խնդիրը»,-նշել է Լ. Ալմագրոն:
Հիշեցնենք, որ Ուրուգվայն առաջին պետությունն է, որ ճանաչել է Հայոց ցեղասպանությունը 1965 թվականին: