2011 թ. մարդահամարի հարցերի փաթեթը նախորդի համեմատ ավելի ընդգրկուն է
3 րոպեի ընթերցում
![2011 թ. մարդահամարի հարցերի փաթեթը նախորդի համեմատ ավելի ընդգրկուն է](http://armenpress.am/resized/480/static/news/b/2011/08/661055.jpg)
ԵՐԵՎԱՆ, 13 ՕԳՈՍՏՈՍԻ, ԱՐՄԵՆՊՐԵՍ: Հայաստանում այս տարվա հոկտեմբերի 12-21-ն անցկացվելիք մարդահամարի հարցերի փաթեթը նախորդ մարդահամարի համեմատ բավականին ընդգրկուն է: Ինչպես «Արմենպրես»-ի հետ զրույցում նշեց ՀՀ ազգային վիճակագրական ծառայության մարդահամարի եւ ժողովրդագրության բաժնի պետ Կարինե Կույումջյանը, հարցերի փաթեթներն արդեն հստակեցված են, կան որոշ դրական փոփոխություններ: Ավելացել են անհատական բնույթի հարցերը, մասնավորապես, կրոնական պատկանելության վերաբերյալ: Փաթեթում ընդգրկված են նաեւ տնային տնտեսություններին վերաբերող հարցեր, օրինակ' արդյո՞ք տվյալ տանը կա համակարգիչ, ինտերնետ կապ գործում է, թե ոչ եւ այլն: Հարցերի մի խումբ էլ վերաբերում է գյուղատնտեսությամբ զբաղվելուն, օրինակ' տվյալ ընտանիքն իր տնօրինության տակ ունի՞ անասնագլխաքանակ կամ որոշակի վարելահողեր եւ այլն: Կան հարցեր ծնունդների, ինչպես նաեւ մահվան դեպքերի գրանցման վերաբերյալ:
Կ. Կույումջյանը նշեց, որ մարդահամարի նախապատրաստական աշխատանքներն ընթանում են բնականոն հունով' ըստ ծրագրվածի: Արդեն ավարտին է մոտենում քաղաքների եւ խոշոր գյուղերի սխեմատիկ հատակագծերի պատրաստման գործընթացը: Միաժամանակ ընթանում են նաեւ տների, շինությունների ցուցակագրումը քաղաքներում ու 5 հազար եւ ավելի բնակչություն ունեցող գյուղերում:
Այդ ամենից հետո, պետք է ծրագրվի' որքան տեղամասեր կստեղծվեն մարդահամարն անցկացնելու համար: Ըստ Կ. Կույումջյանի' պարբերաբար մարզային այցելություններ են իրականացվում, որոնց ընթացքում համայնքի ղեկավարներին ներկայացվում է տեղեկատվություն' մարդահամարին նախապատրաստվելու եւ այն անցկացնելու ժամանակ նրանց գործառույթների վերաբերյալ: Կ. Կույումջյանը կարեւորեց հատկապես կադրերի ընտրությունը. նրանք պետք է անմիջական շփում ունենան մարդկանց հետ: Առաջարկվել է, որ համայնքների ղեկավարները հաշվարարների թեկնածուներ ներկայացնեն: Թեկնածուները պարտադիր պետք է անցնեն ուսուցման փուլ:
«Բնականաբար, մենք որոշակի սահմանափակումներ ենք դնում թեկնածուների ընտրության հարցում: Կարեւոր են գրագիտության բարձր մակարդակը, հաղորդակցման ունակությունները եւ այլն»,- ասաց Կ. Կույումջյանը:
Նա նկատեց, որ համայնքների ղեկավարների հետ հանդիպմանը նշվում է նաեւ հասցեների տնտեսության կարգավորման խնդիրը, որովհետեւ շատ կարեւոր է, որ անվանատախտակներ լինեն փողոցներում, շենքերի համարանիշները փակցված լինեն: Դրանց առկայության պարագայում հաշվարարները շատ արագ կկողմնորոշվեն:
Հաշվարարները կներգարվվեն հոկտեմբերի 1-ից ուսուցման փուլ անցնելուց հետո: Նախատեսվում է ներգրավել շուրջ 12 հազար հաշվարար, կլինեն մոտ 2 հազար 310 հրահանգչական եւ 182 մարդահամարի տեղամասեր: Նրանցից ստացված բոլոր տվյալները կենտրոնացված ձեւով կհավաքագրվեն Ազգային վիճակագրական ծառայությունում: