Մոտ 20 տոկոսով ավելացել է ԼՂՀ Պաշտպանության բանակի պոտենցիալը
3 րոպեի ընթերցում
![Մոտ 20 տոկոսով ավելացել է ԼՂՀ Պաշտպանության բանակի պոտենցիալը](http://armenpress.am/resized/480/static/news/b/2011/08/661027.jpg)
ՍՏԵՓԱՆԱԿԵՐՏ, 12 ՕԳՈՍՏՈՍԻ, ԱՐՄԵՆՊՐԵՍ: Արցախի Անկախության հռչակման 20-ամյակի կապակցությամբ այսօր Լեռնային Ղարաբաղի Հանրապետության պաշտպանության նախարար Մովսես Հակոբյանն ամփոփեց անցած կիսամյակում Պաշտպանության բանակի ունեցած ձեռքբերումներն ու թերացումները:
Խոսելով անցած 20 տարիների ընթացքում ԼՂՀ Պաշտպանության բանակի անցած ուղու մասին' Մ. Հակոբյանն ընդգծեց, որ հայկական բանակը կազմավորվել է Արցախյան ազատամարտի ժամանակ ստեղծված եւ պատերազմի ամբողջ ծանրությունն իրենց ուսերին կրած կամավորական ջոկատների հիմքի վրա: «1992-94 թթ. մենք ոչ միայն դիմագրավել ենք հակառակորդի ճնշումներին, այլեւ նրան ստիպել ենք նստել բանակցային սեղանի շուրջ եւ ստորագրել զինադադարի պայմանագիր, քանի որ մեզ հաջողվել է ոչնչացնել ներկայիս Արցախի տարածքում գտնվող հակառակորդի կրակակետերը»,- ասաց Մ. Հակոբյանը' հավելելով, որ այնուամենայնիվ, Պաշտպանության բանակն իրավիճակից դուրս է եկել որոշակի կորուստներով, քանի որ ադրբեջանական բանակի վերահսկողության տակ են մնացել Շահումյանի շրջանը, Գետաշենի ենթաշրջանը եւ Մարտակերտի ու Մարտունու շրջանների մի հատվածը:
Զինադադարի կնքումից հետո, ըստ Մ. Հակոբյանի, սկսվել են պրոֆեսիոնալ բանակի կառուցման աշխատանքները, որի արդյունքում հաջողվել է ստեղծել տարածաշրջանի ամենամարտունակ եւ հզոր բանակը:
Անդրադառնալով անցած կիսամյակին' ԼՂՀ Պաշտպանության նախարարը նշեց, որ բանակում շարունակվել է դեռեւս 2010 թ-ից սկսված բարեփոխումների ծրագիրը: Մասնավորապես, ըստ Մ. Հակոբյանի, Պաշտպանության բանակը ձեռք է բերել մեծ քանակի նոր սպառազինություն, եւ արդյունքում մոտ 20 տոկոսով ավելացել է բանակի պոտենցիալը: «Ծրագիրը շարունակական է լինելու, եւ մենք թույլ չենք տալու, որ օր օրի սպառազինվող ադրբեջանական բանակը մեզ գերազանցի»,-նշեց Մ. Հակոբյանը:
Պաշտպանության նախարարի խոսքով' անցած կիսամայակում ՀՀ նախագահի աշխատակազմի համապատասխան ծառայության կողմից հանկարծակի տեսչական ստուգում է անցկացվել ՊՆ մեկ դիվիզիայում, որը արժանացել է լավ գնահատականի:
Մ. Հակոբյանը նշեց նաեւ, որ այս տարի հիմնականում ավարտվում է ՊԲ-ի բարձրագույն կրթությամբ սպայական կազմի համալրման գործընթացը: