ՀՀ գլխավոր դատախազը մեկնել է Արգենտինա՝ մասնակցելու Դատախազների միջազգային ասոցիացիայի գործադիր կոմիտեի նիստին

Հայաստանի Հանրապետության գլխավոր դատախազ Աննա Վարդապետյանի գլխավորած պատվիրակությունն աշխատանքային այցով Արգենտինայի Հանրապետության մայրաքաղաք Բուենոս Այրեսում է՝ մասնակցելու Դատախազների միջազգային ասոցիացիայի (IAP) Գործադիր կոմիտեի 62-րդ նիստին և 31-րդ տարեկան համաժողովին։

«Արմենպրես»-ի փոխանցմամբ՝ այս մասին հայտնում են ՀՀ գլխավոր դատախազությունից՝ հիշեցնելով, որ Հայաստանի Հանրապետության գլխավոր դատախազ Աննա Վարդապետյանը 2025 թվականի սեպտեմբերի 9-ին ընտրվել է Դատախազների միջազգային ասոցիացիայի Գործադիր կոմիտեի անդամ։ Գործադիր կոմիտեն Ասոցիացիայի ղեկավար մարմինն է և գործում է Ասոցիացիայի բարձրագույն մարմնի՝ Գլխավոր ժողովի լիազորությունների ներքո։

Դատախազների միջազգային ասոցիացիան միջազգային մասնագիտական կազմակերպություն է, որը միավորում է տարբեր երկրների դատախազներին և նպաստում դատախազական գործունեության ոլորտում միջազգային համագործակցության զարգացմանը, մասնագիտական փորձի փոխանակմանը և իրավունքի գերակայության ամրապնդմանը։

Աշխատանքային այցի շրջանակում նոյեմբերի 14-ին և 15-ին նախատեսված են Դատախազների միջազգային ասոցիացիայի Գործադիր կոմիտեի նիստերը, որոնց ընթացքում կքննարկվեն Ասոցիացիայի գործունեությանը, իրականացվող ծրագրերին և նախաձեռնություններին, ինչպես նաև միջազգային դատախազական համագործակցությանն առնչվող հարցեր։

Նոյեմբերի 16-ին կկայանա Դատախազների միջազգային ասոցիացիայի 31-րդ տարեկան համաժողովը։

Կառույցից հիշեցնում են, որ 2026 թվականի ապրիլի 15-ին Շանհայում տեղի ունեցած՝ Դատախազների միջազգային ասոցիացիայի Գործադիր կոմիտեի 61-րդ նիստի ընթացքում Գործադիր կոմիտեի անդամները միաձայն հավանություն են տվել 2028 թվականին Հայաստանի Հանրապետությունում Ասոցիացիայի Գործադիր կոմիտեի հերթական նիստն անցկացնելու առաջարկին։