8 րոպեի ընթերցում
ԱՆՈՆՍ
05 նոյեմբեր, 2026
ՀՀ ԱԺ
Ժամը 10։00-ին Ազգային ժողովի 334 դահլիճում կկայանա Ազգային ժողովի արտաքին հարաբերությունների, տարածաշրջանային և եվրասիական ինտեգրման հարցերի, եվրոպական ինտեգրման հարցերի, ֆինանսավարկային և բյուջետային հարցերի մշտական հանձնաժողովների համատեղ նիստը: Օրակարգ՝ 1. «Հայաստանի Հանրապետության 2027թ. պետական բյուջեի մասին» օրենքի նախագծում նախատեսված եկամուտներ և ծախսեր՝ արտաքին գործեր և միջազգային առևտուր, միջազգային կազմակերպություններին անդամակցելու վճարումներ։ 2. «Հայաստանի Հանրապետության 2027թ. պետական բյուջեի մասին» օրենքի նախագծում նախատեսված եկամուտներ և ծախսեր՝ եվրասիական տնտեսական միություն և տարածաշրջանի երկրների հետ կապեր: 3. «Հայաստանի Հանրապետության 2027թ. պետական բյուջեի մասին» օրենքի նախագծում նախատեսված եկամուտներ և ծախսեր՝ եվրոպական ինտեգրում:
Ժամը 16։30-ին Ազգային ժողովի 334 դահլիճում կկայանա Ազգային ժողովի կրթության, գիտության, մշակույթի, սպորտի և սփյուռքի հարցերի, ֆինանսավարկային և բյուջետային հարցերի մշտական հանձնաժողովների համատեղ նիստը: Օրակարգ՝ «Հայաստանի Հանրապետության 2027թ. պետական բյուջեի մասին» օրենքի նախագծում նախատեսված եկամուտներ և ծախսեր՝ կրթություն, գիտություն, մշակույթ, սպորտ, սփյուռք, երիտասարդություն և տեղեկատվություն:
ՀՀ կառավարություն
Ժամը 11:00-ին Կառավարությունում տեղի կունենա ՀՀ կառավարության հերթական նիստը:
Պետական կառույցներ
Ժամը 13։00-ին Երևանի Կոմիտասի այգում Կանադա-Եվրասիական առևտրատնտեսական պալատը և Երևանի քաղաքապետարանը համատեղ կանցկացնեն ծառատունկի միջոցառում, որին կմասնակցի նաև ՀՀ-ում Կանադայի դեսպանատունը։ Միջոցառման ընթացքում ողջույնի խոսքով հանդես կգան Կանադա-Եվրասիական առևտրատնտեսական պալատի նախագահ Վարդգես Ավագյանը, ՀՀ-ում Կանադայի դեսպան Ջուլի Քրոուլին, ՀՀ ԱԳՆ ամերիկյան երկրների վարչության պետը, Շենգավիթ վարչական շրջանի ղեկավարը, Երևանի քաղաքապետարանի ներկայացուցիչը և այլք։ Պաշտոնական ելույթներից հետո մասնակիցները կիրականացնեն խորհրդանշական ծառատունկը՝ իրենց ներդրումն ունենալով Երևանի կանաչապատման և շրջակա միջավայրի բարելավման գործում։ +374 96 170814:
Ժամը 15։30-ին Ինժեներական քաղաքում (Երևան, Բագրևանդ 21/1) տեղի կունենա Բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի 17-րդ դափնեկիր Քամ Ղաֆարիանին նվիրված աստղի բացման հանդիսավոր արարողությունը։ Միջոցառմանը կմասնակցեն՝ ՀՀ ԲՏԱ և ԱԲ նախարար Դավիթ Թադևոսյանը, Բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի 17-րդ դափնեկիր Քամ Ղաֆարիանը։ Աստղի բացման արարողությունից հետո տեղի կունենա ճեպազրույց՝ նախարար Դավիթ Թադևոսյանը և Քամ Ղաֆարիանը կպատասխանեն լրատվամիջոցների ներկայացուցիչների հարցերին։ ՀՀ ԲՏԱ և ԱԲՆ, +374 10 590189:
Ժամը 19։00-ին «Մերիդիան» ցուցահանդեսների և միջոցառումների կենտրոնում կկայանա ՀՀ սփյուռքի գործերի գլխավոր հանձնակատարի գրասենյակի կողմից կազմակերպվող Համաշխարհային հայկական երրորդ գագաթնաժողովի բացման հանդիսավոր արարողությունը եւ պաշտոնական ընդունելությունը: Բացման հանդիսավոր արարողությանը ելույթ կունենան ՀՀ վարչապետ Նիկոլ Փաշինյանը և ՀՀ ազգային ժողովի նախագահ Ռուբեն Ռուբինյանը։
ԲՈՒՀ-եր, կրթական հաստատություններ
Ժամը 09։15-ին ԵՊՀ արևելագիտության ֆակուլտետի, Ֆիրդուսու անվան լսարանում տեղի կունենա «Խաղաղությունը և բռնությունից զերծ աշխարհը՝ միջազգային իրավունքի և միաստվածային կրոնների տեսանկյունից» խորագրով երկրորդ միջազգային գիտաժողովը։ Գիտաժողովը կազմակերպում է «Մշակույթների մերձեցման միջազգային» ՀԿ-ն՝ Իրանի Իսլամական Հանրապետության մշակույթի և իսլամական կապերի կազմակերպության Կրոնների երկխոսության կենտրոնի, Թեհրանի համալսարանի իրավագիտության ֆակուլտետի, Երևանի պետական համալսարանի, Հայաստանում ԻԻՀ դեսպանության մշակույթի կենտրոնի և մի շարք այլ գիտական ու մշակութային հաստատությունների համագործակցությամբ։ Գիտաժողովը մեկ հարկի տակ կհամախմբի Հայաստանի, Իրանի և այլ երկրների գիտնականների, իրավագետների, կրոնագետների ու հոգևոր գործիչների՝ քննարկելու ժամանակակից աշխարհում խաղաղության պահպանման, բռնության կանխարգելման և ժողովուրդների միջև փոխըմբռնման ամրապնդման ուղիները։
Մամուլի ակումբներ
Ժամը 14։00-ին Sputnik Արմենիա մուլտիմեդիոն մամուլի կենտրոնում կկայանա ասուլիս՝ «Ինչպիսի՞ն պետք է լինի ապագայի գիտնականը Հայաստանում» թեմայով: Հայաստանում ընթանում է «Ապագայի գիտնականներ» միջազգային գիտակրթական նախագիծը։ Ռուսաստանի առաջատար համալսարանների և հետազոտական կենտրոնների ներկայացուցիչները դասախոսություններ և վարպետաց դասեր են անցկացնում Երևանում։ Նախագծին մասնակցում են Ռուսաստանի համալսարանների և հետազոտական կենտրոնների ընդհանուր առմամբ 12 ներկայացուցիչներ։ Նախագծի ծրագրերի, նպատակների և ակնկալիքների մասին կխոսեն. տեխնիկական գիտությունների դոկտոր, ՌԴ գիտությունների ակադեմիայի պրոֆեսոր, ՌԴ գիտությունների ակադեմիայի տնտեսագիտության և մաթեմատիկայի Կենտրոնական ինստիտուտի գլխավոր գիտաշխատող Անդրանիկ Ակոպովը, քիմիական գիտությունների դոկտոր, Մոսկվայի Լոմոնոսովի անվան պետական համալսարանի քիմիայի ֆակուլտետի դոցենտ Իրինա Լե-Դեյգենը։
Մշակույթ
Ժամը 17։00-ին Հայաստանի պատմության թանգարանում կբացվի «Նեբրայի երկնային սկավառակ. աստղային ձայներ» միջազգային ցուցահանդեսը։ Ցուցադրության առանցքում ավելի քան 3600 տարեկան Նեբրայի երկնային սկավառակն է, որը համարվում է աստղագիտական երևույթների մեզ հայտնի ամենահին պատկերումը։ Նեբրայի երկնային սկավառակը, որը 2013 թվականին ընդգրկվել է ՅՈՒՆԵՍԿՕ-ի «Աշխարհի հիշողություն» գրանցամատյանում, ուշագրավ պատկերացում է տալիս այն մասին, թե ինչպես էին մարդիկ հասկանում և մեկնաբանում տիեզերքը բրոնզի դարում։ Նեբրայի սկավառակի պաշտոնական կրկնօրինակը Երևանում առաջին անգամ կներկայացվի «Աստղային ձայներ» նախագծի շրջանակում։ Գյոթե ինստիտուտի նախաձեռնած այս հայ-գերմանական նախագիծը մի հարկի տակ է միավորում արվեստը, գիտությունն ու պատմությունը՝ հասկանալու, թե ինչպես են մարդիկ տարբեր ժամանակաշրջաններում ու մշակույթներում նայել երկնքին, երազել ու պատմություններ հյուսել տիեզերքի մասին։ Սկավառակի երևանյան ցուցադրությունն ուղեկցվելու է հայ կոմպոզիտոր Վարդան Հարությունյանի «Էնիգմատա» ձայնային ինստալյացիայով։ Ցուցահանդեսը կազմակերպվել է Հալլեի նախապատմության պետական թանգարանի, Հայաստանում Գյոթե ինստիտուտի և Հայաստանի պատմության թանգարանի համագործակցությամբ։ +374 43 54 51 79: