Վարչապետը ներկայացրել է Աջափնյակում բնակիչների համաձայնությամբ նոր թաղամաս կառուցելու գաղափարը
1 րոպեի ընթերցում
Վարչապետ Նիկոլ Փաշինյանն Աջափնյակ վարչական շրջանում քաղաքացիների հետ զրույցում ներկայացրել է ներդրումային ծրագրով, բնակիչների համաձայնությամբ նոր թաղամաս կառուցելու գաղափարը։
«Արմենպրես»-ի հաղորդմամբ՝ վարչապետը հոկտեմբերի 24-ին Երևանում շրջայցի ընթացքում նշել է, որ հնարավոր մոտեցումներից մեկը ներդրողների և բնակիչների միջև անմիջական բանակցություններն են։
«Մեծ ինվեստիցիոն ծրագիր է պետք անել, որ գան մարդիկ, ընդ որում՝ պետությունը չխառնվի, գան ձեզ հետ բանակցեն։ Կամ ձեզնից ձեր տները առնեն, կամ էլ պարտավորվեն նորակառույց շենքում տուն տան»,– ասել է Փաշինյանը։
Նրա ներկայացրած տարբերակով՝ շինարարության ընթացքում պետք է ապահովվի նաև բնակիչների ժամանակավոր կեցությունը։ Վարչապետը շեշտել է բնակիչների համաձայնության պայմանը՝ նշելով, որ այդ դեպքում տարածքում հնարավոր կլինի բոլորովին նոր տրամաբանությամբ թաղամաս կառուցել։