Սիմոն Մարտիրոսյանը նորից կմիանա հավաքականին, երբ լավ մարզավիճակում լինի. Փիլոսյան

Աշխարհի ու Եվրոպայի կրկնակի չեմպիոն, Օլիմպիական խաղերի կրկնակի արծաթե մեդալակիր Սիմոն Մարտիրոսյանը նորից կմիանա ծանրամարտի Հայաստանի հավաքականին, երբ լավ մարզավիճակում լինի:

«Արմենպրես»-ի հաղորդմամբ` ծանրամարտի աշխարհի առաջնությանն ընդառաջ Հայաստանի հավաքականի բաց մարզման ժամանակ լրագրողների հետ զրույցում այս մասին ասաց ծանրամարտի տղամարդկանց ընտրանու գլխավոր մարզիչ Հակոբ Փիլոսյանը:

«Սիմոն Մարտիրոսյանը միշտ եղել է մեր հավաքականի ամենասիրված ու տաղանդավոր մարզիկներից մեկը։  Երբ նա ունենա լավ մարզավիճակ, անմիջապես կլինի հավաքականում: Մենք ոչ մի խնդիր չունենք նրա հետ»,-շեշտեց Հակոբ Փիլոսյանը:

Ծանրամարտի աշխարհի 2026 թվականի առաջնությունում հանդես կգան` 65 կգ` Գառնիկ Չոլաքյանը, 75 կգ` Գոռ Սահակյանը, Տիգրան Կարապետյանը, 85 կգ` Ռաֆիկ Հարությունյանը,  Մարտին Պողոսյանը, 95 կգ` Դավիթ Հովհաննիսյանը, 110 կգ` Գարիկ Կարապետյանը, +110 կգ` Վարազդատ Լալայանը, 57 կգ` Ալեքսանդրա Գրիգորյանը, 77 կգ` Ալինա Սուքիասյանը, 86 կգ` Էմմա Պողոսյանը, Լիանա Գյուրջյանը։

Այս տարի ծանրամարտի աշխարհի առաջնությունը կկայանա հոկտեմբերի 27-ից նոյեմբերի 8-ը Չինաստանի Նինբո քաղաքում: Այն առաջին վարկանիշային մրցաշարն է 2028 թվականի Օլիմպիական խաղերից առաջ: