ԹՐԻՓՓ-ի իրականացումը մտնում է գործնական փուլ. Նիկոլ Փաշինյան

ԹՐԻՓՓ նախագծի իրականացման նախապատրաստական աշխատանքների շրջանակում փոխվարչապետ Մհեր Գրիգորյանի գլխավորած աշխատանքային խումբն այցելել է Սյունիք՝ տեղում ուսումնասիրելու երկաթուղու, ավտոճանապարհի և էներգետիկ ենթակառուցվածքների նախագծման հարցերը։

«Արմենպրես»-ի հաղորդմամբ՝  հոկտեմբերի 22-ի նիստում այս մասին ասաց վարչապետ Նիկոլ Փաշինյանը՝ կարևորելով տարածաշրջանային հաղորդակցությունների հնարավորինս արագ բացումը՝ Հայաստանի տնտեսական դիմակայունությունը բարձրացնելու տեսանկյունից։

«Մեր տնտեսական դիմակայունությունը մեծացնելու առումով շատ էական է, որպեսզի մենք կարողանանք հնարավորինս շուտ հասնել տարածաշրջանային հաղորդակցությունների բացմանը»,- նշեց վարչապետը։

Փաշինյանը հիշեցրեց նաև, որ Ազգային ժողովում մեկնարկել է ԹՐԻՓՓ նախագծի վերաբերյալ Հայաստանի և ԱՄՆ-ի միջև ստորագրված համաձայնագրի վավերացման գործընթացը։

Ներկայացնելով Սյունիք կատարած այցի արդյունքները՝ Մհեր Գրիգորյանը հայտնեց, որ տեղում ուսումնասիրություններն իրականացվել են նախագծման աշխատանքների մեկնարկը կազմակերպելու նպատակով։ Այս փուլում աշխատանքները վերաբերում են երեք ենթակառուցվածքի՝ երկաթուղուն, ավտոճանապարհին և էլեկտրահաղորդման գծերին։

Փոխվարչապետի խոսքով՝ երկաթուղու անցկացման ուղղության հարցը պարզ է, իսկ այցի ընթացքում անհրաժեշտ էր ևս մեկ անգամ տեղում ուսումնասիրել առկա կառույցների վիճակը։

Ավտոճանապարհի դեպքում, ըստ Գրիգորյանի, կան բարդանցանելի հատվածներ, և նախագծային վերջնական լուծումները պետք է ապահովեն ճանապարհի մրցունակությունը։

«Խոսում ենք տրանզիտի մասին, իսկ տրանզիտ ճանապարհը մրցունակ կլինի, և մեր ծախսերն արդյունավետ կլինեն միայն այն դեպքում, եթե այն   շահագործման առավելություն ունենա ռեգիոնալ մակարդակով»,- ընդգծեց փոխվարչապետը։

Նրա փոխանցմամբ՝ էլեկտրահաղորդման գծերի մասով ևս կան վերջնականացման ենթակա հարցեր, որոնց լուծումները կմոդելավորվեն։

Գրիգորյանը նպատակահարմար համարեց նախագծման աշխատանքները սկսել՝ չսպասելով ԹՐԻՓՓ զարգացման ընկերության ձևավորման ավարտին։ Նրա ներկայացմամբ՝ կատարված աշխատանքը հետագայում կփոխանցվի ընկերությանը, երբ այն ձևավորվի և սկսի գործունեությունը։

«Որպեսզի ժամանակ չծախսենք, մենք ճիշտ ենք համարում սկսել նախագծման աշխատանքներն այսօրվանից»,- ասաց փոխվարչապետը՝ հավելելով, որ շուտով քննարկման կներկայացվեն ավելի կոնկրետ էսքիզներ, որից հետո կմեկնարկեն բուն նախագծման աշխատանքները։

Փաշինյանն իր հերթին արձանագրեց, որ նախագիծը մտնում է գործնականացման փուլ՝ այն կարևոր համարելով Հայաստանի տնտեսական դինամիկայի պահպանման և շարունակման համար։

«Հիմա մենք, ըստ էության, պետք է արձանագրենք, որ մտնում ենք գործնականացման փուլ»,- նշեց Փաշինյանը։

Վարչապետը հիշեցրեց, որ առաջիկայում պետք է ձևավորվի հայ-ամերիկյան ԹՐԻՓՓ զարգացման ընկերությունը (TRIPP Development Company):

«Հիմա, ըստ էության, ընկերությունը հիմնադրելու եզրափակիչ փուլում ենք գտնվում, և երբ ընկերությունը կհիմնադրվի, կատարված աշխատանքը, այդ թվում՝ որպես մեր ներդրում, կփոխանցվի այդ ընկերությանը»,- նշեց Փաշինյանը։