Այս հարցը դեռ ճշգրտման կարիք ունի. Միրզոյանը՝ ՀՀ քաղաքացիների՝ Ադրբեջանի տարածքով ԹՐԻՓՓ-ի ընթացակարգով անցնելու հնարավորության մասին

Դեռ ճշգրտման կարիք ունի՝ արդյոք Հայաստանի քաղաքացիներն Ադրբեջանի տարածքով անցնելիս օգտվելու են այն նույն ընթացակարգից, որը նախատեսվում է կիրառել ԹՐԻՓՓ-ի շրջանակում Հայաստանի տարածքով անցնողների համար։

«Արմենպրես»-ի հաղորդմամբ՝ լրագրողների հետ ճեպազրույցում այս մասին    հայտարարել է արտաքին գործերի և միջազգային առևտրի նախարար Արարատ Միրզոյանը՝ պատասխանելով հարցին, թե արդյոք Հայաստանի քաղաքացիներն Ադրբեջանի տարածքով անցնելիս նույնպես օգտվելու են «ֆրոնտ օֆիս–բեք օֆիս» սկզբունքով կազմակերպվող սպասարկումից։

«Հետաքրքիր հարց եք բարձրացնում։ Կարծում եմ՝ այս հարցը, երևի, դեռ ճշգրտման կարիք ունի»,– պատասխանել է Միրզոյանը։

Միաժամանակ նա նշել է, որ բեռների նախնական հայտարարագրման մեխանիզմներ կարող են կիրառվել նաև այնտեղ։

Նախարարն անդրադարձել է նաև անցյալից եկող զգայուն հարցերին ու մարդկանց համար առկա հոգեբանական գործոններին։ Նրա գնահատմամբ՝ խաղաղության հաստատման, երկկողմ առևտրի և տարանցման հարցերում արձանագրվող առաջընթացին զուգահեռ փոփոխություններ են տեղի ունենում նաև այդ հարթությունում։

Միրզոյանի տպավորությամբ՝ այդ գործընթացները զարգանում են ավելի արագ, քան փաստաթղթային աշխատանքը, իսկ որոշ մտահոգություններ, որոնք կողմերը կարող էին ունենալ 2-2.5 տարի առաջ, այսօր նախկին սրությամբ չեն ընկալվում։

Անդրադառնալով Հայաստանի և ԱՄՆ-ի միջև ԹՐԻՓՓ-ի վերաբերյալ համաձայնագրին՝ նախարարը պարզաբանել է, որ դրանով հնարավոր չէր պարտավորություններ սահմանել փաստաթուղթը չստորագրող Ադրբեջանի համար։

«Հայաստան–Միացյալ Նահանգներ համաձայնագիր․ այստեղ չէր կարող լինել որևէ բան, որը պարտավորություն կհայտներ Ադրբեջանին, բայց որը չի ստորագրում Ադրբեջանը»,– նշել է նա։

Միրզոյանը նաև վերահաստատել է, որ ԹՐԻՓՓ-ի շրջանակում սահմանային ու մաքսային որոշումների ընդունումը մնալու է Հայաստանի իրավասու ծառայություններին։ «Ֆրոնտ օֆիսում» մասնավոր օպերատորի հնարավոր ներգրավումը, նրա խոսքով, չի վերացնում անհրաժեշտության դեպքում հայ մաքսավորների և սահմանապահների միջամտությունը։

Նախարարը տարբերակել է նաև քաղաքացիների հետ անմիջական շփում ապահովող սպասարկման գործառույթը և ընկերության ներքին անվտանգության հնարավոր ստորաբաժանումը՝ ընդգծելով, որ դրանք տարբեր գործառույթներ են։