2 րոպեի ընթերցում
Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։
Մոլդովայի խորհրդարանի խոսնակ Իգոր Գրոսուն մերժել է Մոլդովայում Ռուսաստանի Դաշնության կողմից նշանակված դեսպան Օլեգ Օզերովի մեղադրանքները, որոնց համաձայն՝ Արևմուտքը Մոլդովային պատրաստում Ռուսաստանի հետ պատերազմի։ «Արմենպրես»-ի փոխանցմամբ՝ այս մասին հաղորդում է Moldpres գործակալությունը։
«Ես կարծում եմ, որ աշխարհի այս հատվածում միակ և ամենավտանգավոր պետությունը Ռուսաստանի Դաշնությունն է, որը ոչնչացումից բացի ոչինչ չի բերում, ներխուժում է, սպանում, ավերում քաղաքներ, ռմբակոծում գյուղեր և այլն», - ասել է Գրոսուն։
Խոսնակը նաև քննադատել է ռուս դիվանագետի տարածած ուղերձները՝ նշելով, որ նա ներկայացնում է Մոսկվայի իշխանությունների դիրքորոշումը։
Մոլդովայում ՌԴ-ի կողմից նշանակված դեսպան Օլեգ Օզերովը ռուսական լրատվամիջոցներին տված հարցազրույցում ասել է, որ արևմտյան երկրները զինում են Մոլդովային և պատրաստում նրան Ռուսաստանի հետ հնարավոր հակամարտության՝ պնդելով, որ իրավիճակը նման է Ուկրաինայում ստեղծված իրավիճակին։
Օլեգ Օզերովը Քիշնև է ժամանել 2024 թ. հոկտեմբերին և նույն ամսվա ընթացքում իր հավատարմագրերի պատճենները ներկայացրել է Արտաքին գործերի նախարարությանը։ Մինչ օրս նա պաշտոնապես չի հավատարմագրվել որպես Մոլդովայում Ռուսաստանի Դաշնության դեսպան։
Մոլդովայի նախագահ Մայա Սանդուն ավելի վաղ հայտարարել էր, որ Օզերովը չի հրավիրվել իր հավատարմագրերը հանձնելու՝ Մոսկվայի իշխանությունների՝ Մոլդովայի նկատմամբ վերաբերմունքի և հայտարարությունների պատճառով:
Քիշնև ժամանելուց ի վեր Օլեգ Օզերովը բազմիցս կանչվել է Արտաքին գործերի նախարարություն, այդ թվում՝ Ռուսաստանի կողմից Մոլդովայի օդային տարածքի խախտումների առնչությամբ։