Դատարանը Գագիկ Ծառուկյանի կալանքը երկարաձգել է ևս երկու ամսով

Երևան քաղաքի առաջին ատյանի ընդհանուր իրավասության քրեական դատարանը ևս երկու ամսով երկարաձգել է «Բարգավաճ Հայաստան» կուսակցության նախագահ, գործարար Գագիկ Ծառուկյանի կալանքի ժամկետը։ «Արմենպրես»-ի հաղորդմամբ՝ այս մասին դատարանի բակում լրագրողների հետ զրույցում հայտնել է Ծառուկյանի պաշտպան Էմին Խաչատրյանը։

«Դատարանը Գագիկ Ծառուկյանի կալանքը երկարացրեց ևս երկու ամսով։ Որոշումը բողոքարկելու ենք Վերաքննիչ դատարանում»,- ասել է Խաչատրյանը։

Սեպտեմբերի 3-ին Երևան քաղաքի առաջին ատյանի ընդհանուր իրավասության քրեական դատարանի Ավան և Նոր Նորք նստավայրում քննվել էր Ծառուկյանի կալանքի ժամկետը երկարաձգելու վերաբերյալ մեղադրող կողմի միջնորդությունը։ Դատարանը որոշումը հրապարակել է սեպտեմբերի 4-ին։

Գագիկ Ծառուկյանը կալանավորվել է 2026 թվականի հուլիսի 7-ին։ Դատարանն այդ ժամանակ բավարարել էր վարույթն իրականացնող մարմնի միջնորդությունը՝ նրա նկատմամբ որպես խափանման միջոց երկու ամսով կալանք կիրառելու վերաբերյալ։

Ծառուկյանի նկատմամբ քրեական հետապնդումը սկսվել էր հուլիսի սկզբին։ Իրավապահ մարմինները խուզարկություններ էին իրականացրել նրա առանձնատանը, ինչպես նաև նրան և նրա ընտանիքին առնչվող մի շարք ընկերություններում ու այլ տարածքներում։ Դրանից հետո Ծառուկյանը ձերբակալվել էր և ներկայացվել դատարան։

Գագիկ Ծառուկյանին մեղադրանք է առաջադրվել առանձնապես խոշոր չափերով խարդախության և փողերի լվացման համար։ Հետագայում նրան վերագրվող արարքներին ավելացել է նաև հարկերից խուսափելու մեղադրանքը։