ԱՄՆ-ում դատարանը կասեցրել է Թրամփի  հրամանագիրը «ծննդաբերելու նպատակով տուրիզմն» արգելելու մասին

Մերիլենդի դաշնային շրջանային դատարանը սեպտեմբերի 2-ին որոշել է արգելել ԱՄՆ նախագահ Դոնալդ Թրամփի վարչակազմին իրագործել ծննդյան իրավունքով քաղաքացիության շնորհման ենթակա անձանց վերաբերյալ սահմանափակումների մասին հրամանագիրը, որով նախատեսվում էր արգելել ծննդաբերության նպատակով տուրիզմը։ «Արմենպրես»-ի փոխանցմամբ՝ այս մասին հաղորդում է CBS News-ը։

2025 թ. հունվարին պաշտոնը ստանձնելուց ի վեր Թրամփը փորձել է վերացնել կամ սահմանափակել ծննդյան իրավունքով քաղաքացիության իրավունքը։ Հունիսին Գերագույն դատարանի կողմից ծննդյան իրավունքով քաղաքացիությունը վերացնելու նրա նախնական փորձի մերժումից հետո, Թրամփն օգոստոսին  ստորագրեց մեկ այլ՝ ավելի սահմանափակ դրույթներով հրամանագիր՝ մերժելու քաղաքացիություն տրամադրել «օտարերկրյա թշնամիների» երեխաներին, օտարերկրյա կառավարության աշխատակիցներին և ենթադրաբար ծննդաբերության նպատակով տուրիզմով զբաղվող անձանց։

Սեպտեմբերի 2-ին ԱՄՆ շրջանային դատավոր Դեբորա Բորդմանը ժամանակավորապես կասեցրել է Թրամփի վարչակազմի կողմից նոր հրամանագրի կիրառումը։ Ըստ դատավորի՝ հայց ներկայացրած անձինք, հավանաբար, կկարողանան ցույց տալ, որ հրամանագիրը խախտում է Սահմանադրության 14-րդ փոփոխությամբ սահմանված իրենց իրավունքները, որը քաղաքացիություն է շնորհում Միացյալ Նահանգներում ծնված բոլոր անձանց։

Դատարանի վճիռը վերջնական չէ։ Գործի քննությունը  շարունակվում է։

Ծննդյան իրավունքով քաղաքացիության մասին ուղղումն ընդունվել է ԱՄՆ Քաղաքացիական պատերազմից հետո, ինչի շնորհիվ չեղյալ է համարվել Գերագույն դատարանի 1857 թվականի վճիռը, որը մերժում էր աֆրոամերիկացիների քաղաքացիության իրավունքը: