Նիկոլ Փաշինյանի մասնակցությամբ «Սևանի շուրջը» սիրողական հեծանվային արշավն ավարտվել է

Հայաստանի Հանրապետության վարչապետի հովանու ներքո անցացվող «Սևանի շուրջը» երկօրյա սիրողական հեծանվային արշավն ավարտվել է օգոստոսի 30-ին։

«Արմենպրես»-ի փոխանցմամբ՝ այս մասին Ֆեյսբուքի իր էջում հայտնել է ՀՀ վարչապետ Նիկոլ Փաշինյանը` տեղադրելով տեսանյութեր։

Երկօրյա հեծանվարշավին մասնակցության հայտ էր ներկայացրել 106 քաղաքացի, սակայն նախապատրաստական մարզումներից հետո հաստատվել էր նրանցից 86-ի մասնակցությունը:

Առաջին օրվա երթուղին շուրջ 136 կմ էր․ այն բաժանված էր չորս հատվածի՝ մեկնարկից մինչև առաջին կանգառ՝ 35 կմ, առաջինից երկրորդ կանգառ՝ 33 կմ, երկրորդից երրորդ կանգառ՝ 35,4 կմ, իսկ երրորդ կանգառից մինչև գիշերակացի վայր՝ ևս 33 կմ։

Հեծանվային արշավը շարունակվեց նաև օգոստոսի 30-ին։ «Այսօր, ընդհանուր առմամբ, հաղթահարեցինք 77,2 կմ. «Սևանի շուրջը» հեծանվարշավն ավարտեցինք», - գրել է Փաշինյանը։

Երկու օրերի ընթացքում հեծանվորդներն անցել են շուրջ 213 կմ ճանապարհահատված՝ Սևանի շուրջը։ Արշավի բոլոր մասնակիցներին կտրվեն մասնակցության հավաստագրեր։ Միջոցառումը մրցանակային հիմնադրամ չի նախատեսում։

Երկօրյա նախաձեռնության նպատակն էր նպաստել Հայաստանում հեծանվային արշավների ավանդույթի ձևավորմանն ու զարգացմանը, խթանել հեծանվային մշակույթը և առողջ ապրելակերպը։ Միջոցառումն անցկացվում էր սեպտեմբերի 10-13-ը նախատեսված «Tour of Armenia» միջազգային բազմօրյա հեծանվավազքի մրցաշարին ընդառաջ: