365.88
Թունավորման դեպքի պատճառով կասեցվել է «Բամբու» բար-ռեստորանի արտադրական գործունեությունը
2 րոպեի ընթերցում
Մայրաքաղաքի Ազատության պողոտայում գտնվող «Բամբու» բար-ռեստորանի արտադրական գործունեությունը կասեցվել է, քանի որ այդ օբյեկտում սնվելուց հետո «սուր աղիքային վարակ» նախնական ախտորոշմամբ հիվանդանոց էր տեղափոխվել երեք անձ:
Այդ մասին տեղեկացնում է «Արմենպրես»-ը՝ վկայակոչելով Սննդամթերքի անվտանգության տեսչական մարմնի տարածած հաղորդագրությունը։
«Առողջապահության նախարարության հիվանդությունների վերահսկման և կանխարգելման ազգային կենտրոն ՊՈԱԿ-ից ստացված հաղորդագրության հիման վրա Սննդամթերքի անվտանգության տեսչական մարմինը վերահսկողություն էր սկսել «Բամբու» բար-ռեստորանում (ք. Երևան, Ազատության պողոտա 2/2), որի ընթացքում պարզվել է, որ բար-ռեստորանում չեն պահպանվում իրավական ակտերով սահմանված սանիտարահիգիենիկ նորմերը, մասնավորապես՝ խոհանոցի պատի որոշակի հատվածներ չեն ունեցել հարթ մակերես, չեն պահվել նորոգ վիճակում, պատրաստված չեն եղել անջրանցիկ, չներծծող, լվացվող, ախտահանվող նյութերից, առաստաղները և վերին ամրությունները որոշ հատվածներում կառուցված չեն այնպես, որ կանխարգելվի կամ նվազեցվի կեղտի կուտակումը և մասնիկների թափվելու հնարավորությունը, սննդամթերքի մշակման սեղանը և սառնարանի դարակաշարը, որոնք անմիջական շփման մեջ են գտնվում սննդամթերքի հետ, կառուցված չեն եղել հիգիենայի պահանջները բավարարող նյութերից»,- նշված է հաղորդագրության մեջ։
Բար-ռեստորանի արտադրական գործունեությունը կասեցվել է, հայտնաբերված խախտումները վերացնելու համար սահմանվել է ժամկետ:
Հանրային սննդի կետում առկա սննդատեսակներից կատարվել է նմուշառում և տրվել լաբորատոր հետազոտության. արդյունքները կհրապարակվեն:
Բաժանորդագրվեք մեր ալիքին Telegram-ում