Ուկրաինայի նոր վարչապետ է դարձել «Նավթոգազ» ընկերության ղեկավարը

Ուկրաինայի նոր վարչապետ է ընտրվել Ուկրաինայի «Նավթոգազ» ընկերության ղեկավար Սերգեյ Կորեցկին։ «Արմենպրես»-ի փոխանցմամբ՝ այս մասին հայտնել է RBK-Ukraine-ն։

Կորեցկու թեկնածությանը հուլիսի 16-ին կողմ են քվեարկել Գերագույն ռադայի 289 անդամներ։

Սա պատերազմական վիճակում գտնվող Ուկրաինայում արդեն երրորդ վարչապետի ընտրությունն է։

Ավելի վաղ խորհրդարանը պաշտոնանկ էր արել վարչապետ Յուլիա Սվիրիդենկոյին, ինչից հետո կառավարությունը հրաժարական էր տվել։

Սերգեյ Կորեցկին 2025 թվականից ղեկավարում է Ուկրաինայի «Նավթոգազ» ընկերությունը, որը վերահսկում է Ուկրաինայի գազի արդյունահանման, ներմուծման և մատակարարման մեծ մասը:

Նոր վարչապետի ընտրության քվեարկությունն անցկացվել է Ուկրաինայի բազմաթիվ քաղաքներում ընթացող բողոքի ակցիաների ֆոնին։ Հանրահավաքների մասնակիցները դժգոհություն են հայտնում այն փաստից, որ Միխայիլ Ֆեդորովը նոր կառավարությունում չի պահպանելու պաշտպանության նախարարի պաշտոնը։

Նախագահ Զելենսկին բացատրել է Ֆեդորովի պաշտոնանկությունը՝ նշելով նրա հակասությունները զինված ուժերի գլխավոր հրամանատարի հետ և բանակի ցանկություններին հակասող սպառազինությունների գնումները։

Ֆեդորովը հուլիսի 16-ին հրավիրված մամուլի ասուլիսի ժամանակ լրագրողներին հայտնել է, որ նախագահ Զելենսկին առաջարկել է իրեն դառնալ իր խորհրդականը։ Սակայն նա մերժել է այդ առաջարկը։

Ֆեդորովի պաշտոնանկության պատճառով իր պաշտոնից հրաժարվելու որոշում է կայացրել Ուկրաինայի օդային ուժերի հրամանատարի տեղակալ Պավել Ելիզարովը։ Նա հայտարարել է, որ Ֆեդորովին պաշտոնից հեռացնելու որոշումը երկրի համար «բացարձակ չարիք» է։

Նորընտիր վարչապետ Կորեցկին խորհրդարանում հուլիսի 16-ին ակնարկել է, որ պաշտպանության նախարարի պաշտոնում կարող է նշանակվել ներքին գործերի նախարար Իգոր Կլիմենկոն։