ԱԳՆ-ն ներկայացրել է Շենգենյան վիզայի տրամադրման հիմնական կանոնները պարզաբանող խորհրդատվական տեսանյութ
2 րոպեի ընթերցում
Հայաստանի արտաքին գործերի նախարարությունը հրապարակել է Շենգենյան վիզայի տրամադրման հիմնական կանոններն ու ընթացակարգերը պարզաբանող խորհրդատվական տեսանյութ։
Ինչպես հաղորդում է «Արմենպրես»-ը, ԱԳՆ-ն այդ մասին հայտնել է «Ֆեյսբուք»-ի իր էջում։
Նախարարությունից նշել են, որ տեսանյութի նպատակն է բարձրացնել հանրային իրազեկվածությունը, բարելավել ՀՀ քաղաքացիների կողմից դեսպանություններ ներկայացվող դիմումները և դրանց համապատասխանությունը սահմանված պահանջներին՝ այդպիսով նվազեցնելով վիզայի դիմումների մերժման հավանականությունը։
«Ճիշտ կազմված, ժամանակին ներկայացված և լավ հիմնավորված դիմումը բարձրացնում է Շենգենյան վիզա ստանալու հավանականությունը և դրական է ազդում վիզաների ազատականացման ընդհանուր գործընթացի վրա»,- նշված է ԱԳՆ հաղորդագրության մեջ։
Արտաքին գործերի նախարարությունից ընդգծել են, որ ԵՄ անդամ պետությունների կողմից սահմանված կանոններին և պահանջներին համապատասխան դիմումների ներկայացումը կարևոր է ոչ միայն քաղաքացիների ճամփորդական ծրագրերի իրագործման, այլև վիզայի դիմումների մերժման տարեկան ցածր ցուցանիշ ապահովելու համար։
ԱԳՆ-ի գնահատմամբ՝ մերժումների ցածր ցուցանիշը կարևոր նախադրյալ է Հայաստանի Հանրապետության և Եվրոպական միության միջև վիզաների ազատականացման երկխոսությունն առաջ մղելու համատեքստում։