2 րոպեի ընթերցում
Ատլանտյան օվկիանոսի վրա արդեն ձևավորվել է շոգի նոր ալիք, Պորտուգալիայում և Իսպանիայի հարավում սպասվում է մինչև 43°C ջերմաստիճան, Ֆրանսիան և Բենիլյուքսի երկրները պատրաստվում են շոգի հերթական ալիքին։
Առողջապահության համաշխարհային կազմակերպության (ԱՀԿ) Եվրոպայի տարածաշրջանային տնօրեն Հանս Կլյուգեն հայտնել է, որ Եվրոպան բավարար չափով պատրաստ չէ շոգի նոր ալիքին։
Այդ մասին տեղեկացնում է «Արմենպրես»-ը՝ վկայակոչելով Euronews-ը։
Հանս Կլյուգեի խոսքով՝ եվրոպական տարածաշրջանի երկրների նույնիսկ կեսը չունի ծրագրեր՝ ուղղված ծայրահեղ շոգի պայմաններում առողջությանը սպառնացող ռիսկերի մեղմմանը։ ԱՀԿ-ի եվրոպական գրասենյակի ղեկավարն ընդգծել է, որ յուրաքանչյուր երկիր պետք է ունենա նման ծրագրեր, և որ դրանք պետք է ներառեն օդերևութաբանական վաղ նախազգուշացումներ, աշխատանք բարձր ռիսկի խմբերի հետ, ինչպես նաև համակարգում առողջապահության, աշխատանքի անվտանգության, սոցիալական ծառայությունների, բնակարանային ապահովման և քաղաքաշինության ոլորտի գերատեսչությունների միջև։
«Այն երկրներում, որտեղ նման ծրագրերն արդյունավետ են գործում, նախապես հայտնի է, թե ով ինչի համար է պատասխանատու, բնակչության որ խմբերն են առավել մեծ ռիսկի ենթակա, և թե ջերմաստիճանի որ շեմերի դեպքում են գործարկվում արձագանքման կոնկրետ մակարդակները», - ասել է Կլյուգեն։