5 րոպեի ընթերցում
ԱՆՈՆՍ
17 հունիս, 2026
ՀՀ ԱԺ
Ժամը 10:00-ին Ազգային ժողովում աշխատանքը կշարունակի ՀՀ ազգային ժողովի հերթական քառօրյա նիստը:
Պետական կառույցներ
Ժամը 10:00-ին «Արմենպրես» լրատվական գործակալության մամուլի սրահում (Աբովյան 9) տեղի կունենա ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանի, ՄԱԿ-ի Բնակչության հիմնադրամի հայաստանյան գրասենյակի ղեկավար Լուսինե Սարգսյանի, ԵՊՀ Սոցիալական հետազոտությունների իննովացիոն կենտրոնի տնօրեն Արեմ Մկրտչյանի ասուլիսը։ Թեմա. հայրության արձակուրդից օգտվելու տարածվածությունը ՀՀ-ում. հետազոտության արդյունքները։
Ժամը 12:00-ին «Ռամադա» հյուրանոցի «Փոմեգրանետ» սրահում /Փավստոս Բուզանդ 15/ «ԶԻՆԱՊԱՀ» զինծառայողների ապահովագրության ազգային հիմնադրամը հրավիրում է ներկա գտնվելու և լուսաբանելու ԶԻՆԱՊԱՀԻ տարեկան մամուլի ասուլիսը: Ասուլիսի ընթացքում կներկայացվեն ԶԻՆԱՊԱՀԻ ռազմավարական առաջնահերթությունները, գլխավոր գործադիր տնօրենի 2025 թվականի տարեկան և 2026 թվականի առաջին եռամսյակի հաշվետվությունները, հիմնադրամի ֆինանսական գործունեության արդյունքները, կատարված հատուցումները, ինչպես նաև վերջին օրենսդրական փոփոխություններն ու ընթացիկ նախաձեռնությունները։ Ողջույնի և բացման խոսք՝ Հանրային կապերի և հաղորդակցության տնօրեն Լիլյա Գրիգորյան: Ժամը 12:45-ին՝ պարգեւատրման արարողություն:
Կուսակցություններ, ՀԿ-ներ, միջազգային կազմ-ներ
Ժամը 10:30-ին ք.Գյումրի, Շիրակի մարզպետարանի նիստերի դահլիճում (Գ.Նժդեհ փ.16) GIZ-ի կողմից իրականացվող «Կայուն էներգիա հանուն Հայաստանում կլիմայակայուն համայնքային զարգացման» (SE4Resilience) ծրագրի շրջանակում «Ավենյու քընսալթինգ գրուպ» ՍՊ ընկերությունը և «Զենիթ» ակադեմիան Գյումրիում կազմակերպում են տեղեկատվական սեմինար, որի ընթացքում կներկայացվեն էներգախնայողության և էներգաարդյունավետության ոլորտում կիրառվող հիմնական լուծումները, ինչպես նաև կտրամադրվեն գործնական ուղեցույցներ՝ ինչպես գնահատել էներգիայի սպառումը և ինչպես բարձրացնել շենքերի էներգաարդյունավետությունը։ Սեմինարին կհաջորդի հանրային ցուցահանդես՝ որպես գործնական շարունակություն, որտեղ ներկայացվելու են շուկայում առկա էներգաարդյունավետ լուծումները և տեխնոլոգիաները, ինչպես նաև ստեղծվելու է հնարավորություն հանդիպելու ոլորտի մասնագետների հետ։ Ծրագրի եզրափակիչ կանգառը կլինի Գյումրին, որտեղ հունիսի 17-ին կանցկացվի տեղեկատվական սեմինար, իսկ հունիսի 20-ին ժամը 15:00-ից, ք.Գյումրիում /Աբովյան ճեմափողոց/՝ «Էներգաարդյունավետ լուծումներ» հանրային ցուցահանդեսը, որը կամփոփի ծրագրի մարզային միջոցառումների շարքը։ «Ավենյու քընսալթինգ գրուպ» ՍՊԸ, 093 48 83 07: «Զենիթ» ակադեմիա, 095 100 770:
Մամուլի ակումբներ
Ժամը 12:00-ին Մեդիա կենտրոնում տեղի կունենա «Ռեգիոն» հետազոտական կենտրոնի մամուլի ասուլիսը, որի ընթացքում կներկայացվեն տվյալներ՝ Aravot.am, Factor.am, Civilnet.am, Azatutyun.am, Sputnik.am ԶԼՄ-ներում ԱԺ նախընտրական քարոզարշավի լուսաբանման առանձնահատկությունների մասին, ընտրություններին մասնակցած քաղուժերի՝ սոցցանցային հարթակներում իրենց քարոզարշավներն առաջ մղելու 2026-ի պրակտիկայի մասին։ Բանախոս՝ «Ռեգիոն» կենտրոն-ի տնօրեն Լաուրա Բաղդասարյան։ Քննարկումը չի՛ հեռարձակվելու առցանց։ Լրագրողների մուտքն ազատ է։
Մշակույթ
Ժամը 18:00-ին Ժամանակակից արվեստի թանգարանում կկայանա Էդուարդ Խարազյանի անհատական ցուցահանդեսի բացումը։
Ժամը 19:30-ին Արամ Խաչատրյան համերգասրահում տեղի կունենա բեթհովենյան գեղեցիկ երեկո։ Կներկայացվեն Բեթհովենի աշխարհահռչակ 7-րդ սիմֆոնիան և «Կորիոլան» նախերգանքը՝ Հայաստանի պետական սիմֆոնիկ նվագախմբի կատարմամբ։ Դիրիժոր՝ Ստեֆան Ֆրուխտ։ +374 93 51 71 12
Սպորտ
Ժամը 16:00-ին Ազատության հրապարակում կկայանա անվասայլակով բասկետբոլի ցուցադրական խաղ։ ՀՀ-ում ԱՄՆ դեսպանությունը հայտնում է, որ ԱՄՆ սպորտային բանագնացներ Ռոզ Հոլլերմանն ու Սթիվ Սերիոն՝ ամերիկացի երկու ամենահայտնի ու բազմաթիվ մրցանակների արժանացած անվասայլակով բասկետբոլիստներն արդեն Հայաստանում են։ Այցն իրականացվում է ԱՄՆ պետքարտուղարության կրթական ու մշակութային գործերի բյուրոյի «Սպորտային բանագնացներ» ծրագրի շրջանակում։ Սա նաև ԱՄՆ անկախության 250-ամյա հոբելյանին նվիրված «Ազատություն 250» խորագրով իրականացվող նախաձեռնություններից մեկն է։