Լյուքսեմբուրգը շնորհավորել է Հայաստանին և խորհրդարանական ընտրությունները հաջողված համարել

Լյուքսեմբուրգի արտաքին գործերի նախարարությունը շնորհավորել է Հայաստանին՝ հունիսի 7-ին կայացած խորհրդարանական ընտրությունների հաջող անցկացման և քաղաքացիների ակտիվ մասնակցության կապակցությամբ։

«Արմենպրես»-ի հաղորդմամբ՝ այս մասին Լյուքսեմբուրգի ԱԳ նախարարությունը գրառում է կատարել X-ի միկրոբլոգում։

«Շնորհավորում ենք Հայաստանի ժողովրդին՝ հաջող ընտրությունների և ժողովրդավարական ակտիվ մասնակցության կապակցությամբ։ Քվեարկությունը հստակ վերահաստատում է Հայաստանի հանձնառությունը ժողովրդավարությանը, կայունությանը և Եվրոպայի հետ ավելի սերտ կապերին։ Մենք անհամբեր սպասում ենք մեր գործընկերության խորացմանը»,-ասված է գրառման մեջ։

Congratulations to the people of Armenia on the successful elections & strong democratic participation.

The vote is a clear reaffirmation of Armenia’s commitment to democracy, stability, and closer ties with Europe.

We look forward to deepening our partnership.

— MFA Luxembourg 🇱🇺 (@MFA_Lu) June 10, 2026

Հայաստանում հունիսի 7-ին տեղի ունեցած խորհրդարանական ընտրությունների նախնական արդյունքներով խորհրդարան են անցնում երեք քաղաքական ուժեր՝ «Քաղաքացիական պայմանագիր» կուսակցությունը, «Ուժեղ Հայաստան» դաշինքը և «Հայաստան» դաշինքը։

Նախնական տվյալներով՝ «Քաղաքացիական պայմանագիր» կուսակցությունը ստացել է 727 հազար 827 ձայն կամ 49,825 տոկոս։ Ստացած ձայների շնորհիվ կուսակցությունը խորհրդարանում մեծամասնություն կստանա և կձևավորի կառավարություն։

«Ուժեղ Հայաստան» դաշինքը ստացել է 340 հազար 088 ձայն կամ 23,281 տոկոս, իսկ «Հայաստան» դաշինքը՝ 145 հազար 113 ձայն կամ 9,934 տոկոս։

Անցողիկ շեմին՝ 4 տոկոսին, շատ մոտ է «Բարգավաճ Հայաստան» կուսակցությունը։ Նախնական արդյունքներով ԲՀԿ-ն ստացել է 3,996 տոկոս ձայն։ Խորհրդարան անցնելու համար կուսակցությանը պակասում է 0,004 տոկոսային կետ։

ԲՀԿ-ն ավելի վաղ հայտարարել էր, որ դիմելու է ԿԸՀ՝ մի շարք ընտրատեղամասերում վերահաշվարկ իրականացնելու համար։ Վերահաշվարկի անհրաժեշտության մասին հայտարարել էին նաև այլ քաղաքական ուժեր։