ԵԱՏՄ-ն պետք է նոր հնարավորություններ բացի Հայաստանի համար, այլ ոչ թե հակառակը․ Փաշինյան

ՀՀ վարչապետ Նիկոլ Փաշինյանը հայտարարել է, որ Եվրասիական տնտեսական միությունը պետք է նոր հնարավորություններ բացի Հայաստանի համար, որպեսզի հանրապետությունում ԵԱՏՄ-ի նկատմամբ դրական վերաբերմունքն աճի։ «Արմենպրես»-ի հաղորդմամբ՝ «Իզվեստիա»-ի լրագրողի հարցերին պատասխանելիս Փաշինյանն անդրադարձել է ԵԱՏՄ-ի և Եվրամիության միջև հնարավոր ընտրության, ինչպես նաև Աստանայում ԵԱՏՄ գագաթնաժողովի շրջանակում ընդունված հայտարարությանը։

Վարչապետը նշել է, որ Հայաստանում Եվրամիությանն անդամակցելու հարցով հանրաքվե կարող է անցկացվել միայն այն դեպքում, երբ Հայաստանը պաշտոնապես դիմի Եվրամիությանը կամ շատ մոտ լինի թեկնածուի կարգավիճակ ստանալուն։

«Քանի դեռ Հայաստանը պաշտոնապես չի դիմել Եվրամիությանը՝ Եվրամիության լիիրավ անդամ դառնալու համար, հանրաքվե չի լինի։ Հենց դա տեղի ունենա, հանրաքվեն կլինի»,-ասել է նա։

Անդրադառնալով ԵԱՏՄ չորս անդամ երկրի ղեկավարների ընդունած հայտարարությանը՝ Փաշինյանը նշել է, որ ծանոթացել է դրա բովանդակությանը։

«Ես կարդացել եմ։ Այնտեղ շատ հավասարակշռված տեքստ է։ Փաստորեն, մեր գործընկերները չորս երկրներից աջակցում են Հայաստանում հանրաքվե անցկացնելու գաղափարին՝ Հայաստանի որոշման հարցով»,-ասել է վարչապետը։

Լրագրողի հարցին, թե արդյոք Հայաստանը տեսնո՞ւմ է ԵԱՏՄ-ի առավելությունները, Փաշինյանը պատասխանել է, որ դրանք ակնհայտ են, սակայն միությունն էլ պետք է նոր հնարավորություններ ստեղծի։

«Իհարկե, հասկանում ենք։ Բայց ես կարծում եմ, որ այս դեպքում ԵԱՏՄ-ն պետք է նոր հնարավորություններ ցույց տա, բացի նոր հնարավորություններ, որպեսզի ԵԱՏՄ-ի իմիջը Հայաստանի Հանրապետությունում աճի, այլ ոչ թե հակառակը»,-նշել է նա։

Վարչապետի խոսքով՝ որոշ սահմանափակումներ հակառակ ազդեցությունն են ունենում և Հայաստանի քաղաքացիների շրջանում բացասական ընկալում են ձևավորում ԵԱՏՄ-ի նկատմամբ։

«Եթե կիրառվում են ինչ-որ սահմանափակումներ, դա Հայաստանի քաղաքացիների շրջանում ստեղծում է ԵԱՏՄ-ի վերաբերյալ բացասական ընկալում։ Դա ինձ անհանգստացնում է»,-ասել է Փաշինյանը։

Նա նաև հիշեցրել է, որ ԵԱՏՄ-ում զբաղեցնում է եզակի դիրք, քանի որ միաժամանակ անդամ է և՛ Եվրասիական տնտեսական բարձրագույն խորհրդի, և՛ Եվրասիական միջկառավարական խորհրդի։

«Ինձ համար նաև պատասխանատվություն է, որ Հայաստանի Հանրապետությունում ԵԱՏՄ-ն դրական իմիջ ունենա, բայց որոշ որոշումներ դրան չեն նպաստում։ Սակայն ես վստահ եմ, որ բոլոր խնդիրները կլուծենք»,-ընդգծել է վարչապետը։