Ռումինիան փակում է Ռուսաստանի գլխավոր հյուպատոսությունը. ՌԴ հյուպատոսն անցանկալի անձ է հայտարարվել
2 րոպեի ընթերցում
Անօդաչու թռչող սարքի միջադեպից հետո Ռումինիան որոշել է փակել Կոնստանցայում Ռուսաստանի գլխավոր հյուպատոսությունը՝ գլխավոր հյուպատոսին անցանկալի անձ հայտարարելով։ «Արմենպրես»-ի փոխանցմամբ, այս մասին հայտարարել է Ռումինիայի նախագահ Նիկուսոր Դանը երկրի Բարձրագույն պաշտպանության խորհրդի նիստից հետո, որտեղ քննարկվել են ռումինական Գալաթի քաղաքի շենքի վրա անօդաչու թռչող սարքի վթարի հետևանքները։
«Այս իրավիճակում Կոնստանցայում Ռուսաստանի գլխավոր հյուպատոսը հայտարարվել է անցանկալի անձ, իսկ Ռուսաստանի գլխավոր հյուպատոսությունը կփակվի», - ասել է երկրի ղեկավարը, ում ելույթը հեռարձակվել է նախագահի աշխատակազմի կայքում։
Ավելի վաղ Ռումինիայի պաշտպանության նախարարությունը հայտնել էր, որ Գալացիի բնակելի շենքի տանիքին անօդաչու թռչող սարք է վթարի ենթարկվել։ Բուխարեստը միջադեպի համար մեղադրել է Ռուսաստանին։ Երկրի արտաքին գործերի նախարարությունը հայտարարել է, որ կանչել է Ռուսաստանի դեսպանին՝ նրան տեղեկացնելու դիվանագիտական մակարդակով ձեռնարկվելիք միջոցառումների մասին։
Ռումինիայի իշխանությունները հայտնել են, որ հարևան Ուկրաինայի վրա մայիսի 29-ին Ռուսաստանի գիշերային հարձակման ընթացքում անօդաչու թռչող սարք է ընկել ռումինական Գալաթի քաղաքի 10 հարկանի բնակելի շենքի տանիքին։ Դրա հետևանքով պայթյուն և հրդեհ է բռնկվել։ Երկու մարդ վիրավորվել է։
Միջադեպի կապակցությամբ Ռուսաստանի դեսպանը կանչվել էր ԱԳՆ։
Նախագահ Նիկուսոր Դանը հայտարարել էր, որ թույլ չի տա Ռուսաստանին երկիրը ներքաշել Ուկրաինայի դեմ պատերազմի մեջ։