1 րոպեի ընթերցում
Ամերիկյան կործանիչները շուրջօրյա պարեկություններ են իրականացնում Մերձավոր Արևելքի՝ Իրանին հարակից շրջաններում։ «Արմենպրես»-ի հաղորդմամբ՝ այս մասին հայտարարել է ԱՄՆ ԶՈւ Կենտրոնական հրամանատարությունը (CENTCOM)։
Օդային գործողություններում ներգրավված են ցամաքային տեղակայման F-16 և F-35A կործանիչներ ու անօդաչու թռչող սարքեր, ինչպես նաև ավիակիրների տախտակամածին հերթապահող F/A-18 Super Hornet կործանիչներ և ռադիոէլեկտրոնային պայքարի EA-18G Growler ինքնաթիռներ, որոնք առաքելություններ են իրականացնում Հորմուզի նեղուցի շրջանում։ Թռիչքների տևողությունն ապահովում են Մերձավոր Արևելքի բազաներից օդ բարձրացող լիցքավորող ինքնաթիռները։
CENTCOM-ն ավելի վաղ նաև հաղորդել էր Մերձավոր Արևելքում B-1B Lancer ռազմավարական ռմբակոծիչների ուսումնական թռիչքների մասին, որոնք իրականացվում են առանց առաքելության կոնկրետ տարածքի նշման։
Ներկայումս մերձավորարևելյան բազաներում և Արաբական ծովում գտնվող երկու ավիակիրներին տեղակայված են ամերիկյան առնվազն 200 մարտական ինքնաթիռներ, ինչպես նաև մեծ քանակությամբ լիցքավորող և օդային վաղ նախազգուշացման և կառավարման ինքնաթիռներ։