ԵՄ-Մոլդովա խորհրդարանական ասոցացման հանձնաժողովը կոչ է արել ԵՄ խորհրդին անհապաղ սկսել ԵՄ անդամակցության շուրջ բանակցությունները

ԵՄ-Մոլդովա խորհրդարանական ասոցացման հանձնաժողովը կոչ է արել ԵՄ խորհրդին անհապաղ սկսել անդամակցության բանակցությունները բոլոր խմբերի հոդվածների շուրջ՝ ընդգծելով, որ այս քայլը կհաստատի Քիշնևի առաջընթացի ճանաչումը և կամրապնդի ընդլայնման գործընթացի հավաստիությունը։ «Արմենպրես»-ի փոխանցմամբ՝ այս մասին հաղորդում է Moldpress-ը։

Կոչը ներառված է Բրյուսելում կայացած ԵՄ-Մոլդովա խորհրդարանական ասոցացման հանձնաժողովի 17-րդ նիստում ընդունված եզրափակիչ հռչակագրում։

«Խորհրդարանական ասոցացման հանձնաժողովը կոչ է անում Եվրոպական խորհրդին առանց որևէ հետագա ուշացման պաշտոնապես սկսել բանակցությունները բոլոր խմբերի հոդվածների շուրջ՝ սկսած Խորհրդում Կիպրոսի նախագահության ընթացքում «Հիմունքների» խմբից և անցնելով մյուս հինգ խմբերին մինչև 2026 թվականի վերջը», - նշվում է հռչակագրում։

Ասոցացման հանձնաժողովը դատապարտել է Ռուսաստանի Դաշնության գործողությունները, այդ թվում՝ էներգետիկ ենթակառուցվածքների վրա հարձակումները և Մոլդովայի Հանրապետության օդային տարածքով ԱԹՍ-ների և հրթիռների անօրինական թռիչքները, որոնք համարվում են ինքնիշխանության լուրջ խախտումներ և տարածաշրջանային անվտանգությանը սպառնացող սպառնալիքներ։

Հռչակագրում հանձնաժողովը ողջունել է Քիշնևի իշխանությունների կողմից իրականացվող բարեփոխումների «ռեկորդային» տեմպը, ինչպես նաև անդամակցության հոդվածների բոլոր վեց խմբերի վերաբերյալ տեխնիկական բանակցությունների մեկնարկը:

Փաստաթղթում ընդգծվում է ԵՄ-ի կողմից տրամադրված խոշոր ֆինանսական աջակցությունը, այդ թվում՝ բարեփոխումներին և տնտեսական աճին նվիրված 1,9 միլիարդ եվրոյի փաթեթը։

Փաստաթղթի մեջ ընդգծվել է Մոլդովայի Հանրապետության ինտեգրումը կարևոր եվրոպական նախաձեռնություններին, այդ թվում՝ Ռումինիայի հետ համագործակցությունը, մասնավորապես էներգետիկ անվտանգության ոլորտում։

Հռչակագիրը արտացոլել է նաև անվտանգության հետ կապված լուրջ մտահոգություններ: Հանձնաժողովը դատապարտել է էներգետիկ ենթակառուցվածքների վրա հարձակումները և ընդգծել դրանց ազդեցությունը երկրի էներգետիկ կայունության վրա՝ կոչ անելով ԵՄ-ի և Մոլդովայի միջև ամրապնդել համագործակցությունը պաշտպանության, կիբերանվտանգության և ճգնաժամերի կառավարման ոլորտներում։