2 րոպեի ընթերցում
Ռումինիայի խորհրդարանն անվստահության քվե է հայտնել վարչապետ Իլիե Բոլոժանի (Ազգային-ազատական կուսակցություն) կառավարությանը: «Արմենպրես»-ի փոխանցմամբ՝ այս մասին հաղորդում է ՏԱՍՍ-ը:
Կառավարության հրաժարականի օգտին քվեարկել է 281 պատգամավոր և սենատոր, դեմ՝ 4-ը: Անվստահության քվեին հավանություն տալու համար անհրաժեշտ էր առնվազն 233 ձայն: Կառավարող կոալիցիոն կուսակցությունների՝ Ազգային-ազատական կուսակցության, Հանուն Ռումինիայի փրկության դաշինքի և Ռումինիայի հունգարացիների դեմոկրատական միության պատգամավորները մնացել են դահլիճում, բայց չեն մասնակցել քվեարկությանը:
«Վերջ տնտեսության կործանման, բնակչության աղքատացման և պետական սեփականության խարդախ վաճառքի՝ Բոլոժանի պլանին» փաստաթուղթը խորհրդարան են ներկայացրել Ռումինիայի սոցիալ-դեմոկրատական կուսակցությունը, Հանուն ռումինացիների միավորման դաշինքը և «Խաղաղություն – ամենից առաջ Ռումինիան» խմբակցությունը:
Նրանք Բոլոժանի կառավարությանը մեղադրում են այն բանի համար, որ նրա ընդունած խիստ խնայողության միջոցները հանգեցրել են ռումինացիների կենսամակարդակի կտրուկ անկման։ Բացի այդ, վարչապետին մեղադրում են պետության ռազմավարական ակտիվներն օտարերկրյա ընկերություններին վաճառելու մտադրության համար: