Կարմիր հրապարակի շքերթը կանցկացվի առանց ռազմական տեխնիկայի՝ առաջին անգամ Ուկրաինայում պատերազմի մեկնարկից ի վեր

Ռուսաստանի պաշտպանության նախարարությունը պաշտոնապես հայտարարել է, որ Մայիսի 9-ի շքերթին Մոսկվայի Կարմիր հրապարակում ռազմական տեխնիկայի շարասյուներ և զինվորական կուրսանտներ չեն լինի, տեղեկացնում է «Արմենպրես»-ը։

Նման լուրեր ավելի վաղ տարածվել էին ոչ պաշտոնապես։

ՌԴ պաշտպանության նախարարության հայտարարության համաձայն՝ շքերթը կրճատվել է «գործող օպերատիվ իրավիճակի պատճառով»։

«Հետևակային շարասյան կազմում շքերթին կմասնակցեն զինված ուժերի բոլոր ճյուղերի և առանձին տեսակների բարձրագույն ռազմական ուսումնական հաստատությունների զինծառայողները», - նշվում է գերատեսչության հայտարարության մեջ։

Այնուամենայնիվ, ըստ նախարարության, «զինվորական տեխնիկայի շարասյունն» այս տարի շքերթին չի մասնակցի։

«Պատճառը ներկայիս օպերատիվ իրավիճակն է», - նշված է Ռուսաստանի ՊՆ-ի Telegram ալիքում հրապարակված հայտարարության մեջ։

Պաշտպանության նախարարությունը նաև հայտարարել է, որ «Սուվորովի և Նախիմովի անվան ռազմական դպրոցների և կուրսանտների կորպուսի սաները չեն մասնակցի» Կարմիր հրապարակում կայանալիք շքերթին։

2022 թ. փետրվարին Ռուսաստանի կողմից Ուկրաինայում ռազմական գործողությունների ծավալումից ի վեր առաջին անգամ է, որ ռազմական տեխնիկան չի մասնակցի Մայիսի 9-ին Կարմիր հրապարակում կայանալիք շքերթին։

Այնուամենայնիվ, ըստ հայտարարության՝ շքերթի ավիացիոն մասը կկայանա։

Վերջին տարիներին շքերթի ավիացիոն մասը պարբերաբար չեղարկվել է վատ եղանակի պատճառով։