Մեղրու Մեծ թաղի Սուրբ Աստվածածին եկեղեցի․ 17-րդ դար

Մեղրու Մեծ թաղի Սուրբ Աստվածածին եկեղեցին դասվում է 17-րդ դարի գմբեթավոր եկեղեցիների շարքին, այն հիմնադրվել է 1673 թվականին։ Գտնվում է Մեղրի քաղաքի բարձրադիր հյուսիսային թաղամասում, բոլոր կողմերից շրջապատված է բնակելի տներով։ Քառամույթ գմբեթավոր բազիլիկ է։ Կառուցված է բազալտով, թմբուկն ու գմբեթը՝ աղյուսով, ունի երկու մուտք՝ արևմուտքից և հարավից։ Եկեղեցին ունի արտաքին զուսպ հարդարանք։ Ներքուստ եկեղեցին զարդարված է 19-րդ դարի որմնանկարներով: