2 րոպեի ընթերցում
Իրանը չի պատրաստվում բանակցությունների ընթացքում ընդունել ամերիկացիների ցանկացած մոտեցում:
«Բանակցությունները շարունակելը չի նշանակում «պայմանավորվածությունների հասնել ցանկացած գնով և ընդունել մյուս կողմի ցանկացած մոտեցում», - Al Jazeera հեռուստաալիքին ասել է Իրանի ազգային անվտանգության և արտաքին պաշտպանության կոմիտեի ղեկավար Իբրահիմ Ազիզին։
«Արմենպրես»-ի փոխանցմամբ, կոմիտեի ղեկավարը նշել է, որ իրանական կողմն ընթացիկ բանակցությունները դիտարկում է որպես մարտական գործողությունների շարունակություն։ «Եթե դրանք արդյունքներ տան, որոնք կհաստատեն մարտադաշտում ձեռքբերումները, ապա բանակցային ասպարեզը մեզ համար կդառնա հնարավորություն... Բայց ոչ այն դեպքում, եթե ամերիկացիները մտադիր են սա որպես պատրվակ օգտագործել իրենց չափազանց մեծ պահանջների համար, որոնք հիմնված են նրանց ագրեսիվ մոտեցման վրա», - հավելել է Ազիզին։
«Իրանը «կարմիր գծեր» է սահմանել, և դրանք անհրաժեշտ է պահպանել», - նշել է նա։
Ապրիլի 19-ին ԱՄՆ-ի նախագահ Դոնալդ Թրամփը հայտարարել է, որ իր ներկայացուցիչները մեկնում են Իսլամաբադ՝ մասնակցելու Իրանի հետ բանակցություններին։ ՄԱԿ-ում ԱՄՆ-ի մշտական ներկայացուցիչ Մայք Ուոլցը պնդում էր, որ ԱՄՆ-ի և Իրանի բանակցությունները կվերսկսվեն առաջիկա 24 ժամվա ընթացքում, սակայն IRNA գործակալությունը հաղորդել է, որ Իրանը հրաժարվել է մասնակցել բանակցությունների երկրորդ փուլին։