Թրամփը հայտարարել է, որ Իրանը համաձայնել է ԱՄՆ-ին տալ հարստացված ուրանը

ԱՄՆ նախագահ Դոնալդ Թրամփը հայտարարել է, որ Իրանը համաձայնել է ԱՄՆ-ին տալ հարստացված ուրանը, որը 2025 թ. հունիսին իրանական միջուկային օբյեկտներին ամերիկյան հարվածներից հետո մնացել է գետնի տակ։ «Արմենպրես»-ի փոխանցմամբ՝ այս մասին հաղորդում է The Associated Press գործակալությունը։

«Նրանք համաձայնել են մեզ վերադարձնել միջուկային փոշին, որը խորը գետնի տակ է B-2 ռմբակոծիչներով մեր հարձակումից հետո», - ասել է Թրամփը Լաս Վեգաս մեկնելուց առաջ լրագրողների հետ զրույցում։

«Միջուկային փոշի» ասելով՝ Թրամփը նկատի ունի Իրանի հարստացված ուրանը։ Ըստ ԱԷՄԳ-ի՝ Իրանն ունի 440,9 կգ մինչև 60% հարստացված ուրան, իսկ միջուկային զենքի ստեղծման համար հարկավոր է մինչև 90% հարստացված ուրան։

Իրանը բազմիցս հավաստիացրել է, որ չի ցանկանում միջուկային զենք ստեղծել, և որ իր միջուկային ծրագիրը միայն խաղաղ բնույթ է կրում։  

Ըստ տեղեկությունների՝ Իսլամաբադում ապրիլի 11-12-ին տեղի ունեցած բանակցություններում ԱՄՆ-ն Իրանից պահանջել է հրաժարվել իր միջուկային ծրագրից և Վաշինգտոնին տրամադրել իր հարստացված ուրանը։