«Խաղաղության կամուրջ» նախաձեռնությունը միտված է նոր նարատիվների և հնարավորությունների ձևավորմանը. Քոչինյան

«Խաղաղության կամուրջ» նախաձեռնությունը նպատակ ունի առկա պատմության և նարատիվների կողքին ձևավորել նոր մոտեցումներ և հնարավորություններ՝ ուղղված հայ-ադրբեջանական հարաբերություններում խաղաղության օրակարգի առաջմղմանը։ «Արմենպրես»-ի հաղորդմամբ՝ այս մասին հայտարարեց «Հայկական խորհուրդ» վերլուծական կենտրոնի նախագահ, նախաձեռնության համակարգող Արեգ Քոչինյանը։ Մամուլի ասուլիսի ընթացքում, ամփոփելով 2026 թվականի ապրիլի 10-12-ը Ադրբեջանի Գաբալա քաղաքում տեղի ունեցած հանդիպման արդյունքները, Քոչինյանը նշեց, որ նախաձեռնության շրջանակում արդեն տեղի է ունեցել չորրորդ հանդիպումը, ինչը, նրա գնահատմամբ, ինքնին կարևոր ձեռքբերում է։

«Կարծում եմ՝ արդեն իսկ այն փաստը, որ այս ֆորմատով 4-րդ հանդիպումն է տեղի ունենում և կա պայմանավորվածություն շարունակելու հանդիպումները, բավականին մեծ ձեռքբերում է»,-ասաց նա։

Քոչինյանի խոսքով՝ փոխադարձ այցերը, չնայած բազմաթիվ դժվարություններին և քննադատություններին, նպաստում են խաղաղության օրակարգի առաջմղմանը։

«Մենք կարող ենք նշել հարյուրավոր պատճառներ, թե ինչու այս այցելությունները չպետք է տեղի ունենան, բայց կա մեկ հիմնական պատճառ, թե ինչու դրանք պետք է լինեն՝ դրանք նպաստում են խաղաղության հաստատմանը Հայաստանի և Ադրբեջանի հասարակությունների միջև»,-ընդգծեց նա։

Նրա փոխանցմամբ՝ հանդիպումների շրջանակում կողմերը շփվել են նաև պետական պաշտոնյաների հետ, որոնք վստահեցրել են, որ խաղաղության գործընթացն արդեն ընթացքի մեջ է։

«Մեզ վստահեցնում են, որ Հայաստանի և Ադրբեջանի միջև արդեն կա խաղաղություն, որը գտնվում է խորացման և ընդլայնման փուլում»,-նշեց նա։

Միաժամանակ Քոչինյանը շեշտեց, որ նախաձեռնությունը նպատակ չունի վերանայել կամ մոռացության տալ անցյալը։

««Խաղաղության կամուրջ» նախաձեռնությունն անցյալը մոռանալու կամ ուրանալու մասին չէ։ Այն առկա նարատիվների կողքին նոր նարատիվներ և նոր հնարավորություններ ձևավորելու մասին է»,-ասաց նա։

Քոչինյանը նաև ընդգծեց, որ նման նախաձեռնությունները չեն կարող երաշխավորել արագ արդյունքներ, սակայն դրանց բացակայությունը կբացառի խաղաղության հասնելու հնարավորությունը։