2 րոպեի ընթերցում
ՀՀ վարչապետ Նիկոլ Փաշինյանը հայտարարել է, որ Հայաստանը ներկայում կարողանում է համատեղել Եվրասիական տնտեսական միության (ԵԱՏՄ) և Եվրամիության հետ համագործակցության օրակարգերը՝ ընդգծելով, որ վերջնական որոշումը կընդունեն Հայաստանի քաղաքացիները։ «Արմենպրես»-ի հաղորդմամբ՝ ՌԴ նախագահ Վլադիմիր Պուտինի հետ հանդիպման ընթացքում Փաշինյանը նշել է, որ երկու միավորումներին անդամակցությունը սկզբունքորեն անհամատեղելի է, սակայն ներկայիս փուլում առկա օրակարգերը համատեղելի են։
«Այն, ինչ մենք անում ենք և այն օրակարգը, որ ունենք, առնվազն այս պահին համատեղելի են։ Դա փաստ է։ Եվ քանի դեռ հնարավորություն կա այդ օրակարգերը համատեղելու, մենք դա անելու ենք»,- ասել է վարչապետը։
Նրա խոսքով՝ երբ գործընթացները հասնեն այն փուլին, երբ անհրաժեշտ կլինի ընտրություն կատարել, որոշումը կընդունվի Հայաստանի քաղաքացիների կողմից։
Փաշինյանը նաև ընդգծել է, որ Ռուսաստանի հետ հարաբերությունները մնում են առաջնային և չեն կարող դրվել հարցականի տակ։
ՌԴ նախագահ Վլադիմիր Պուտինը նույն հանդիպման ընթացքում հայտարարել էր, որ անհնար է միաժամանակ լինել Եվրամիության և ԵԱՏՄ մաքսային տարածքներում։
«Եվրամիության և ԵԱՏՄ-ի հետ մաքսային միությունում գտնվելն անհնար է։ Դա պարզապես հնարավոր չէ ըստ սահմանման»,- ասել էր Պուտինը։