Զախարովան հայտարարել է, որ Ռուսաստանը պատրաստ է օգնել Հայաստանին հիրբրիդային հարձակումների դեմ պայքարում
2 րոպեի ընթերցում
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Մոսկվան պատրաստ է Հայաստանի հետ բաց երկխոսության և համագործակցության՝ տեղեկատվական և կիբեռանվտանգության հարցերում, եթե հայկական կողմը ցուցաբերի համապատասխան հետաքրքրվածություն։
«Արմենպրես»-ի փոխանցմամբ՝ Զախարովան այդ մասին ասել է ապրիլի 1-ին կայացած ճեպազրույցի ժամանակ՝ անդրադառնալով ՀՀ ԱԳ նախարար Արարատ Միրզոյանի այն հայտարարությանը, թե Հայաստանը պատրաստ է լսել նաև Ռուսաստանի փորձը հիբրիդային հարձակումների դեմ պայքարի ուղղությամբ, եթե այդպիսին կա։
«Այս մասին կարելի է անվերջ խոսել։ Սա երկկողմանի երթևեկությամբ ճանապարհ է․ եթե կա կարիք և հետաքրքրվածություն, մենք պատրաստ ենք պատասխանել։ Իսկ թե ինչպիսի հնարավորություններ ունի Ռուսաստանը, պետք է հստակեցնել պահանջը՝ տեղեկատվության պաշտպանություն, կիբեռխարդախության դեմ պայքար և այլն։ Մենք պատրաստ ենք ոչ միայն փորձագիտական կարծիք տրամադրել, այլև համագործակցություն մի շարք ուղղություններով»,- նշել է նա։
Ըստ Զախարովայի՝ ՌԴ ԱԳՆ-ում գործում է միջազգային տեղեկատվության անվտանգության դեպարտամենտ, ինչպես նաև այլ կառույցներ, որոնք զբաղվում են այս ոլորտով։
Օրեր առաջ ՀՀ ԱԳ նախարար Արարատ Միրզոյանը հայտարարել էր, որ Երևանը պատրաստ է դիտարկել նաև Մոսկվայի աջակցությունը հիբրիդային սպառնալիքների դեմ պայքարում, եթե ՌԴ-ն նման փորձ ունի։