44-օրյա պատերազմի քննիչ հանձնաժողովի զեկույցը չի կարող հրապարակվել քաղաքական հայեցողությամբ, դա իրավական հարց է. Արթուր Հովհաննիսյան

44-օրյա պատերազմի հանգամանքներն ուսումնասիրող քննիչ հանձնաժողովի զեկույցը հրապարակել-չհրապարակելու հարցը բացառապես իրավական բնույթ ունի և չի կարող լուծվել քաղաքական հայեցողությամբ։

«Արմենպրես»-ի հաղորդմամբ՝ այս մասին հայտարարեց ՀՀ Ազգային ժողովի «Քաղաքացիական պայմանագիր» խմբակցության քարտուղար Արթուր Հովհաննիսյանը խորհրդարանական ճեպազրույցի ընթացքում։

«Տեսեք, 44-օրյա պատերազմի քննիչ հանձնաժողովի զեկույցի հրապարակման հարցը բացառապես իրավական հարց է, քաղաքական հայեցողության հարց չէ, և դրա հրապարակման պատասխանը իրավական ընթացակարգերով է տրվում։ Հետևաբար, քաղաքական հայեցողությամբ դա չի կարող հրապարակվել որևէ կերպ»,-ասաց նա։  

Պատգամավորը հիշեցրեց, որ այդ հարցի վերաբերյալ իշխանությունները բազմիցս դիրքորոշում են հայտնել։

Անդրադառնալով անհայտ կորածների հարազատների հետ աշխատանքին՝ Հովհաննիսյանը նշեց, որ նրանց հետ իրականացվում է պարբերական շփում։

«Ինչ վերաբերում է անհայտ կորածների ծնողների, հարազատների հետ աշխատանքին, մենք նրանց հետ պարբերական աշխատանք ենք իրականացնում, և այս իմաստով, ես կարծում եմ, որ ամեն բան արվում է մեր կողմից նրանց նկատմամբ հոգատարության իմաստով նաև»,- ընդգծեց նա։

Անհայտ կորածների մի խումբ հարազատներ օրերս Ազգային ժողովի շենքի մոտ բողոքի ակցիա էին անցկացնում՝ Ազգային ժողովի ղեկավարությունից պահանջելով հրապարակել 44-օրյա պատերազմի հանգամանքներն ուսումնասիրող քննիչ հանձնաժողովը զեկույցը։ ՀՀ ԱԺ նախագահ Ալեն Սիմոնյանն ավելի վաղ հայտարարել էր, որ հանձնաժողովի զեկույցը պատրաստ է, սակայն այն չեն կարող հրապարակել, քանի որ դրանում կան գաղտնիք պարունակող տեղեկություններ։ Սիմոնյանը նշել էր, որ դրան կարող են ծանոթանալ ցանկացող բոլոր պատգամավորները։