2 րոպեի ընթերցում
Հրդեհ է բռնկվել «Կանազ» մշակույթի տանը։
Այս մասին դեպքի վայրից տեղեկացրեց «Արմենպրես»-ի թղթակիցը՝ հավելելով, որ հրդեհն ընդգրկում է գրեթե ամբողջ շենքը։
Տեղում աշխատում են ՆԳՆ Փրկարար ծառայության 8 հրշեջ մեքենա, ինչպես նաև ոստիկաններ։
Ինչպես նշեց թղթակիցը՝ քիչ առաջ մշակույթի տան հարակից շենքից բնակիչների տարհանում է սկսվել։
ՀՀ ՆԳՆ փրկարար ծառայությունից հայտնեցին, որ մարտի 25-ին, ժամը 19։12-ին ՆԳՆ 112 օպերատիվ կառավարման կենտրոն ահազանգ է ստացվել, որ Երևան քաղաքի Ազատության պողոտայում գտնվող շինություններից մեկում հրդեհ է բռնկվել։
Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ և Հրդեհաշիջման և փրկարարական աշխատանքների կազմակերպման բաժնի հերթապահ խումբը։
Հրդեհի բարդությունից ելնելով հայտարարվել է «Թիվ 3 կանչ». դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս վեց մարտական հաշվարկ։Կտրվի լրացուցիչ տեղեկություն։
Երևանի «Կանազ» մշակույթի տանը բռնկված հրդեհը, հրշեջների աշխատանքի արդյունքում՝ համեմատաբար հանդարտվել է։
Այս մասին դեպքի վայրից տեղեկացրել է «Արմենպրես»-ի թղթակիցը՝ մանրամասնելով, որ Փրկարար ծառայության հրշեջներին հաջողվել է մուտք գործել շինություն և հրդեհաշիջման աշխատանքներն իրականացնել նաև ներսում։
«Արմենպրես»-ի թղթակիցը դեպքի վայրից տեղեկացնում է, որ հրդեհը լոկալիզացվել է, իսկ շենքի ներսում, առանձին օջախների մարման ուղղությամբ, հրշեջներն աշխատանքը շարունակում են։
Շրջակայքում շարունակվում է շտապօգնության մեքենաների և համապատասխան մյուս ստորաբաժանումների հերթապահությունը։
Փրկարար ծառայությունը հաղորդում է, որ նախնական տվյալներով տուժածներ չկան։