2 րոպեի ընթերցում
Մոսկվայի և Վաշինգտոնի միջև երկխոսությունը ներկայում շարունակվում է տարբեր մակարդակներում, առանձին հարցերի շուրջ: Ինչպես «Արմենպրես»-ը տեղեկանում է «Ինտերֆաքս» գործակալությունից, այս մասին հայտարարել է ՌԴ արտաքին գործերի նախարար Սերգեյ Լավրովը։
«Մենք ամերիկացի գործընկերների հետ երկխոսություն ենք վարում տարբեր մակարդակներում, տարբեր ձևաչափերով, առանձին ճգնաժամերի, մեր հարաբերությունների առանձին ուղղությունների շուրջ։ Սակայն ես ամենևին չեմ կասկածում, որ անխուսափելի է դարձել սկզբունքային, համապարփակ զրույցն այն մասին, թե ինչպես է ԱՄՆ-ն տեսնում աշխարհը, ինչպես է նա տեսնում իրեն այս աշխարհում և ինչ դեր է նա հատկացնում բոլոր մնացածներին», - ասել է նա Մոսկվայում կայացած մամուլի ասուլիսում։
Լավրովն ընդգծել է, որ «դա հատկապես միջուկային տերությունների համար է արդիական հասկանալի պատճառներով»։
«Նախագահ Պուտինը ժամանակին առաջարկել է անցկացնել միջուկային զենք ունեցող հինգ պետությունների, ՄԱԿ-ի Անվտանգության խորհրդի մշտական անդամների գագաթնաժողով, և այս նախաձեռնությունը լիովին պահպանում է իր արդիականությունը։ Այս զրույցը վաղուց էր հասունացել։ Ես կասեի՝ այն վաղուց է գերհասունացել, և ես հույս ունեմ, որ Թրամփի վարչակազմում հասկանում են դա և պատրաստ կլինեն նման լուրջ խոսակցության», - ասել է ՌԴ ԱԳ նախարարը։