2 րոպեի ընթերցում
Հայաստանում Իրանի դեսպան Խալիլ Շիրղոլամին հայտարարել է, որ Հայաստանի և Իրանի միջև ցամաքային սահմանը բնականոն ռեժիմով աշխատում է, և Հայաստանի այն քաղաքացիները, որոնք գտնվում են Իրանում և ցանկանում են լքել երկիրը, կարող են դա անել ցամաքային սահմանով։
«Արմենպրես»-ի փոխանցմամբ՝ այդ մասին դեսպանն ասել է Երևանում մարտի 2-ին հրավիրված մամուլի ասուլիսի ընթացքում։
«Հայաստանի քաղաքացիների պարագայում, որոնք գտնվում են Իրանում և ցանկանում են վերադառնալ Հայաստան, երկկողմ ցամաքային կապը բնականոն կերպով գործում է, և նրանք կարող են ցամաքային տեղաշարժման միջոցներով հատել սահմանը և հասնել Հայաստան»,- ասել է դեսպանը։
Նա հավելել է, որ Իրանի ցամաքային բոլոր սահմանները համապատասխան տեխնիկական պատրաստվածության են բերվել, իսկ Իրանի օտարերկրյա բոլոր դեսպանատներին խնդրել են, որպեսզի վերջիններս Իրանում գտնվող իրենց քաղաքացիներին դուրս բերելու ուղղությամբ համապատասխան քայլեր ձեռնարկեն։
Փետրվարի 28-ին Իսրայելն ու ԱՄՆ-ը հարվածներ են հասցրել Իրանին: Թեհրանը պատասխան գործողություններ է սկսել, ինչից հետո հակամարտությունը վերածվել է ռազմական բախման և իրավիճակի սրման ողջ Մերձավոր Արևելքի տարածաշրջանում: Իրանն ու Իսրայելն անմիջապես, հետագայում նաև այլ երկրներ հայտարարել են օդային տարածքները փակելու մասին: Իրավիճակով պայմանավորված՝ հետաձգվել կամ չեղարկվել են նաև Երևանից և դեպի Երևան բազմաթիվ թռիչքներ: