2 րոպեի ընթերցում
ԱՄՆ նախագահ Դոնալդ Թրամփը ներկայացրել է Իրանի դեմ մեկնարկած լայնածավալ ռազմական գործողություններ սկսելու նպատակները։
«Արմենպրես»-ի հաղորդմամբ՝ Դոնալդ Թրամփը Truth Social-ի իր էջում հրապարակված տեսաուղերձում հայտարարել է, որ ԱՄՆ-ի համբերությունը սպառվել է Իրանի հետ բանակցությունների հարցում։
Ուղերձում նա խոստացել է ոչնչացնել Իրանի միջուկային ու հրթիռային արդյունաբերությունը և ռազմածովային ուժերը։
Թրամփի խոսքով՝ ռազմագործողության նպատակն է պաշտպանել ամերիկյան ժողովրդին՝ վերացնելով Իրանի կողմից անմիջական սպառնալիքները։ Նա հայտարարել է, որ Իրանը երբեք չի կարող միջուկային զենք ունենալ։ «Մենք կոչնչացնենք նրանց հրթիռները, նրանց ռազմածովային նավատորմը»,- ասել է Թրամփը։
ԱՄՆ նախագահը դիմել է նաև Իրանի ժողովրդին.
«Երբ մենք ավարտենք, վերցրեք կառավարությունը, այն ձերը կլինի»,- հայտարարել է Թրամփը։
Դոնալդ Թրամփը դիմել է նաև Իրանի Իսլամական հեղափոխության պահապանների կորպուսին՝ կոչ անելով վայր դնել զենքերը։
«Դուք պետք է վայր դնեք ձեր զենքերը։ Ձեզ հետ արդար կվարվեն՝ լիակատար անձեռնմխելիությամբ, հակառակ դեպքում դուք անխուսափելիորեն կմահանաք»,- ասել է ԱՄՆ նախագահը։
Միևնույն ժամանակ, Թրամփը շեշտել է, որ ԱՄՆ կառավարությունն ամեն ինչ արել է՝ նվազագույնի հասցնելու կորուստները տարածաշրջանում գտնվող ամերիկյան անձնակազմի համար։