Չինաստանը և Գերմանիան տարբեր ոլորտներում համագործակցությունը խորացնելու ցանկություն են հայտնել

Չինաստանը և Գերմանիան ցանկանում են խորացնել համագործակցությունը տարբեր ոլորտներում։ Ինչպես «Արմենպրես»-ը տեղեկանում է Reuters-ից, այս մասին փետրվարի 25-ին Պեկինում հայտարարել են Գերմանիայի կանցլեր Ֆրիդրիխ Մերցը և Չինաստանի վարչապետ Լի Ցյանը։

Լիի հետ զրույցում Մերցը նշել է, որ Գերմանիան մեծ նշանակություն է տալիս նախորդ տարի իր ամենամեծ առևտրային գործընկեր Չինաստանի հետ լայնածավալ տնտեսական փոխանակումների պահպանմանը և խորացմանը՝ միաժամանակ ընդգծելով արդար համագործակցության և բաց հաղորդակցության անհրաժեշտությունը։

«Մենք շատ կոնկրետ մտահոգություններ ունենք մեր համագործակցության վերաբերյալ, որը մենք ցանկանում ենք կատարելագործել և արդար դարձնել», - ասել է Մերցը։

Լին կոչ է արել երկու կողմերին համատեղ աշխատել բազմակողմանիության և ազատ առևտրի պաշտպանության համար։

«Չինաստանը և Գերմանիան՝ որպես աշխարհի երկու խոշորագույն տնտեսություններ և կարևոր ազդեցություն ունեցող խոշոր երկրներ, պետք է ամրապնդեն մեր վստահությունը համագործակցության նկատմամբ, համատեղ պաշտպանեն բազմակողմանիությունը և ազատ առևտուրը և ձգտեն կառուցել ավելի արդար համաշխարհային կառավարման համակարգ», - ասել է Լի Ցյանը։

Չնայած ավելի խորը համագործակցության կոչերին՝ Մերցի և Լիի հանդիպումից հետո պաշտոնապես կնքված համաձայնագրերը նեղ թիրախային էին և վերաբերում էին երկու տնտեսությունների համար երկրորդական ոլորտներին։

Ստորագրված հինգ փաստաթղթերը վերաբերում են կլիմայի փոփոխության և կանաչ անցման ոլորտում շարունակական ջանքերին, կենդանիների հիվանդությունների կանխարգելման ոլորտում համագործակցությանը և թռչնամսի արտադրանքի վերաբերյալ արձանագրությանը, ինչպես նաև ֆուտբոլի և սեղանի թենիսի սպորտային համագործակցության համաձայնագրերին։

Գերմանիայի կանցլեր Ֆրիդրիխ Մերցը փետրվարի 25-ին երկօրյա պաշտոնական այցով ժամանել է Չինաստանի մայրաքաղաք Պեկին։ Նրան ուղեկցում են 30 ընկերությունների, այդ թվում՝ Volkswagen-ի և BMW-ի նման առաջատար ավտոարտադրողների բարձրաստիճան ղեկավարներ։ Այցի նպատակն է վերականգնել կապերը առևտրային անհավասարակշռության ընդլայնման ֆոնին։