Շիրակի երկրագիտական թանգարանի նմուշները կցուցադրվեն Ֆրանսիայի Նախապատմության թանգարանում

Շիրակի երկրագիտական թանգարանի 137 նմուշ կցուցադրվի Ֆրանսիայի Նախապատմության թանգարանում։ Շիրակի երկրագիտական թանգարանի վաղ բրոնզի դարաշրջանը ներկայացնող 87 անուն թանգարանային նմուշ (ընդհանուր 137 առարկա) մայիսի 22-ից հոկտեմբերի 31-ը կներկայացվի Լյուսակ-լե-Շատոյի թանգարանում՝ համատեղ ցուցահանդեսի շրջանակներում։

Ինչպես «Արմենպրես»-ին տեղեկացրին Շիրակի մարզպետի աշխատակազմից, ցուցադրության կազմակերպման և նմուշների տեղափոխմանն առնչվող հարցերը քննարկվել են փետրվարի 24-ին՝ մարզպետ Դավիթ Առուշանյանի և Ֆրանսիայի Հանրապետության Լյուսակ-լե-Շատո քաղաքի Նախապատմության թանգարանի տնօրեն Ֆրանսուա Դեբրաբանտի հանդիպման ժամանակ:

Մարզպետ Դավիթ Առուշանյանը, ողջունելով հյուրերին, ներկայացրել է մարզի հնագիտական հարուստ շերտերն ու Գյումրիի մշակութային ինքնատիպությունը։ Նա ընդգծել է, որ տարածաշրջանի հնավայրերը վկայում են հազարամյակների շարունակական կյանքի մասին, իսկ Շիրակի հնագիտական գանձերը մարդկության հավաքական հիշողության մասն են:

«Հայաստանի և Ֆրանսիայի բարեկամությունը վերջին շրջանում առավել սերտանում է թե՛ դիվանագիտական, թե՛ մշակութային ուղղություններով։ Ուրախ եմ, որ Շիրակի երկրագիտական թանգարանի ցուցանմուշները կներկայացվեն բարեկամ Ֆրանսիայում։ Թող այս ցուցադրությունը դառնա նոր կամուրջ երկու երկրների միջև՝ ամրապնդելով փոխըմբռնումն ու համագործակցությունը»,-նշել է մարզպետը։

Լյուսակ-լե-Շատո քաղաքի Նախապատմության թանգարանի տնօրեն Ֆրանսուա Դեբրաբանտը շնորհակալություն է հայտնել ընդունելության համար՝ կարևորելով պետական պաշտոնյաների ուշադրությունը պատմական ժառանգության հանրահռչակման նկատմամբ։

Ցուցանմուշների փաթեթավորման, առաքման և վերադարձի հարցերով զբաղվելու են մասնագետները, իսկ բոլոր ծախսերը, այդ թվում՝ ապահովագրությունը, հոգալու է հրավիրող կողմը: