ՌԴ-ն կպահպանի ռազմավարական հարձակողական սպառազինությունների սահմանափակումները, քանի դեռ ԱՄՆ-ն պահպանում է այն. Լավրով
3 րոպեի ընթերցում
«Ռազմավարական հարձակողական սպառազինությունների կրճատման մասին» ռուս-ամերիկյան պայմանագրով նշված սահմանաքանակներին առնչվող մորատորիումը պահպանվում է այնքան ժամանակ, քանի դեռ ԱՄՆ-ն նույնպես չի գերազանցի նշված սահմանաքանակները: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Ռուսաստանի արտաքին գործերի նախարար Սերգեյ Լավրովը՝ Պետդումայում կայացած «կառավարության ժամի» ընթացքում:
«Լավատեսություն չի ներշնչում բարդ իրավիճակը ռազմավարական կայունության ոլորտում, որի վատթարացման համար մի շարք եվրոպացի ռուսատյացներ անհիմն մեղադրում են հենց Ռուսաստանին: Մինչդեռ (ՌԴ) նախագահ Պուտինի կողմից առաջադրված նախաձեռնությունը՝ ՌՀՍԿ պայմանագրի մասնակիցների կողմից դրանում ամրագրված կենտրոնական քանակական սահմանափակումների հետագա կամավոր կատարման վերաբերյալ, մնացել է առանց պաշտոնական պատասխանի ամերիկյան կողմից», - նշել է ՌԴ դիվանագիտական գերատեսչության ղեկավարը:
«Մենք հիմք ենք ընդունում այն, որ մեր կողմից այդ մորատորիումը, որը հայտարարել է նախագահը, կպահպանվի, բայց միայն այնքան ժամանակ, քանի դեռ Միացյալ Նահանգները նույնպես չի գերազանցի հիշյալ սահմանաքանակները», - ընդգծել է Ռուսաստանի արտաքին գործերի նախարարը:
Լավրովի խոսքով՝ Ռուսաստանն, ընդհանուր առմամբ, կգործի պատասխանատու և կշռադատված՝ ԱՄՆ ռազմական քաղաքականության վերլուծության հիման վրա. այդ վերլուծությունը կատարվում է ամեն օր, և ռազմավարական ոլորտի ընդհանուր իրադրության վերլուծության հիման վրա:
2026 թ. փետրվարի 5-ին լրացել է ԱՄՆ-ի և Ռուսաստանի միջև «Ռազմավարական հարձակողական սպառազինությունների կրճատման մասին» պայմանագրի ժամկետը։ Այս փաստաթուղթը կարգավորում էր աշխարհի երկու խոշորագույն միջուկային զինանոցների քանակը և միջազգային կայունություն ապահովող հիմնական համաձայնագրերից մեկն էր։ ԱՄՆ-ն և Ռուսաստանը պայմանագիրը ստորագրել էին 2010 թվականին: 2021 թվականին այն երկարաձգվել էր ևս հինգ տարով՝ մինչև 2026 թվականը։
ԱՄՆ-ին և Ռուսաստանին բաժին է ընկնում աշխարհի միջուկային զինանոցի 86%-ը:
2025 թ. հոկտեմբերին ՌԴ նախագահ Վլադիմիր Պուտինն առաջարկել էր ԱՄՆ-ին կամավոր կերպով ևս մեկ տարի պահպանել պայմանագրով նախատեսված սահմանափակումները: Ամերիկյան կողմը չէր արձագանքել այս առաջարկին: