Վարչապետ Փաշինյանը հայտնեց, որ Դոնալդ Թրամփի հրավերով մասնակցելու է «Խաղաղության խորհրդի» առաջին հանդիպմանը
2 րոպեի ընթերցում
Հայաստանի Հանրապետության վարչապետ Նիկոլ Փաշինյանը Միացյալ Նահանգների նախագահ Դոնալդ Թրամփի հրավերով փետրվարի 19-ին մասնակցելու է Գազայի «Խաղաղության խորհրդի» առաջնորդների հանդիպմանը։
«Արմենպրես»-ի հաղորդմամբ՝ այս մասին Միացյալ Նահանգների փոխնախագահ Ջեյ Դի Վենսի հետ համատեղ հայտարարության ժամանակ հայտարարեց Հայաստանի վարչապետ Նիկոլ Փաշինյանը։
«Ցանկանում եմ նաև նշել, որ ստացել եմ և սիրով ընդունել եմ ԱՄՆ նախագահ Դոնալդ Թրամփի հրավերը՝ փետրվարի 19-ին մասնակցելու Խաղաղության խորհրդի առաջին նիստին»,-նշեց վարչապետ Փաշինյանը։
Ամերիկայի Միացյալ Նահանգների նախագահ Դոնալդ Թրամփի նախագահությամբ ձևավորված Խաղաղության խորհրդի կազմում այժմ ընդգրկված է 27 անդամ, որոնց թվում են նաև Հայաստանի Հանրապետության վարչապետ Նիկոլ Փաշինյանը և Ադրբեջանի նախագահ Իլհամ Ալիևը։
Հունվարի 22-ին Դավոսում տեղի է ունեցել Խաղաղության խորհրդի կանոնադրության ստորագրման արարողությունը։ Ստորագրման արարողությանը մասնակցել են Հայաստանի, ԱՄՆ-ի, Արգենտինայի, Ադրբեջանի, Բահրեյնի, Բուլղարիայի, Եգիպտոսի, Հունգարիայի, Ինդոնեզիայի, Հորդանանի, Ղազախստանի, Կոսովոյի, Մարոկկոյի, Պակիստանի, Քաթարի, Պարագվայի, Սաուդյան Արաբիայի, Թուրքիայի, ԱՄԷ-ի, Ուզբեկստանի պատվիրակությունների ղեկավարները: