2 րոպեի ընթերցում
Հայաստանի և Ադրբեջանի կառավարությունների միջև փոխանակվել է առուվաճառքի պոտենցիալ ապրանքախմբերի ցանկ:
«Արմենպրես»-ի փոխանցմամբ՝ այս մասին լրագրողների հետ ճեպազրույցում հայտնեց Հայաստանի վարչապետ Նիկոլ Փաշինյանը:
«Դեռևս ուսումնասիրության պրոցես է գնում»,- ասաց վարչապետը:
Նիկոլ Փաշինյանն անդրադարձավ նաև Ադրբեջանից բենզինի նոր խմբաքանակի ներկրմանը, նշեց՝ առաջին խմբաքանակը ներկրելիս տեղեկացվել են հայկական այն ընկերությունները, որոնք դրանից քաղաքական ակցիա չէին ստեղծի, ինչի մտավախությունը հաստատվեց այն ժամանակ, երբ հայկական որոշ ընկերություններ հրաժարվեցին վաճառել Ադրբեջանից ներկրված բենզինը:
«Այս գործընթացի արդյունքում բոլորի համար հասկանալի կլինի, որ այդ շուկան և հնարավորությունը բաց է բոլորի համար, և ով ուզում է, կարող է դրանից օգտվել»,- նշեց Փաշինյանը:
Ադրբեջանից Հայաստան առաջին անգամ նավթամթերք ներմուծվեց 2025 թվականի վերջին․ դեկտեմբերի 19-ին Ադրբեջանից Վրաստանի տարածքով Հայաստան ուղարկված ադրբեջանական բենզինով բեռնված գնացքը ժամանեց «Այրում» երկաթուղային կայարան։ Գնացքը բաղկացած էր 22 վագոնից՝ բեռնված 1218 տոննա քաշով A-95 տեսակի բենզինով։
Հայաստանի էկոնոմիկայի նախարարությունից «Արմենպրես»-ին հաստատել էին, որ Հայաստան է ներկրվում ադրբեջանական բենզինի երկրորդ խմբաքանակը։ Ադրբեջանական լրատվամիջոցները հայտնել են, որ նախատեսվում է փոխադրել 1000 տոննա A92 տեսակի բենզին, նույնքան դիզվառելիք և 1800 տոննա A95 տեսակի բենզին: