3 րոպեի ընթերցում
Սիրիայի արտաքին գործերի նախարար Ասաադ Հասան աշ-Շայբանին և պաշտպանության նախարար գեներալ-մայոր Մուրհաֆ Աբու Կասրան Մոսկվայում հանդիպել են Ռուսաստանի նախագահ Վլադիմիր Պուտինի հետ։ «Արմենպրես»-ի փոխանցմամբ՝ այս մասին հայտնում է սիրիական SANA գործակալությունը։
Հանդիպման ընթացքում քննարկվել են փոխադարձ հետաքրքրություն ներկայացնող քաղաքական, ռազմական և տնտեսական հարցեր՝ մասնավորապես կենտրոնանալով ռազմական արդյունաբերության ոլորտում ռազմավարական համագործակցության վրա։
Կողմերն անդրադարձ են կատարել ռազմական և տեխնիկական գործընկերության զարգացման ուղիներին, որոնք կնպաստեն սիրիական բանակի պաշտպանական կարողությունների բարձրացմանը և ռազմական արդյունաբերության ժամանակակից զարգացումներին համընթաց քայլելուն, մասնավորապես՝ սիրիական բանակի ռազմական տեխնիկայի արդիականացման, տեխնիկական փորձի փոխանցման և հետազոտությունների ու զարգացման ոլորտում համագործակցությանը՝ ազգային պաշտպանական համակարգի ամրապնդմանը նպաստելու և Սիրիայում ու տարածաշրջանում անվտանգությունն ու կայունությունը պահպանելու նպատակով։
Քաղաքական առումով կողմերը քննարկել են տարածաշրջանային և միջազգային վերջին զարգացումները և ընդգծել Դամասկոսի ու Մոսկվայի միջև քաղաքական և դիվանագիտական համակարգման կարևորությունը միջազգային ֆորումներում։
Երկու կողմերն էլ ընդգծել են միջազգային իրավունքի սկզբունքները հարգելու և պետությունների ներքին գործերին օտարերկրյա միջամտությունը մերժելու անհրաժեշտությունը։
Տնտեսական մասով քննարկումները կենտրոնացել են երկու երկրների միջև առևտրատնտեսական համագործակցության ընդլայնման հեռանկարների վրա, որն ընդգրկում է վերակառուցման նախագծերին աջակցությունը, ենթակառուցվածքային ոլորտների զարգացումը, Սիրիայում ներդրումների խրախուսումը և առևտրաշրջանառության ու գործընկերության ամրապնդումը։
Հանդիպման ընթացքում նախագահ Պուտինը հաստատել է Ռուսաստանի անսասան աջակցությունը Սիրիային՝ ընդգծելով Սիրիայի տարածքային ամբողջականության և լիակատար ինքնիշխանության պահպանման կարևորությունը, ինչպես նաև մերժելով երկիրը բաժանելու կամ նրա անկախ ազգային որոշումների կայացման գործընթացը խաթարելուն ուղղված ցանկացած նախագիծ։ Նա նաև վերահաստատել է Մոսկվայի դիրքորոշումը՝ դատապարտելով Իսրայելի կողմից Սիրիայի տարածքի կրկնվող խախտումները՝ դրանք համարելով տարածաշրջանի կայունությանն ու անվտանգությանն ուղղված ուղիղ սպառնալիք։