Աշգաբաթում հանդիպել են Ռուսաստանի և Իրանի նախագահները

Ռուսաստանի նախագահ Վլադիմիր Պուտինն Աշգաբաթում հանդիպել է Իրանի նախագահ Մասուդ Փեզեշքիանի հետ։ 

«Արմենպրես»-ի փոխանցմամբ՝ այս մասին հայտնում է «ՌԻԱ նովոստի» գործակալությունը։ 

Ռուսաստանի առաջնորդի խոսքով՝ Մոսկվայի և Թեհրանի միջև համագործակցությունը հաջողությամբ զարգանում է, այդ թվում էներգետիկայի և գյուղատնտեսության ոլորտներում։ Նախորդ տարի առևտրաշրջանառությունն աճել է 13%-ով, իսկ 2025 թվականի առաջին երեք եռամսյակներում՝ ևս ութ տոկոսով.

Պուտինը նշել է, որ Մոսկվան աջակցում է Թեհրանի միջուկային ծրագրին.

«Մենք սերտ կապի մեջ ենք բոլոր կարևոր միջազգային հարցերի, այդ թվում՝ Իրանի միջուկային ծրագրին վերաբերող բոլոր հարցերի շուրջ: Դուք գիտեք մեր դիրքորոշումը. մենք աջակցում ենք Իրանին ՄԱԿ-ում»,- ասել է ՌԴ նախագահը: 

Նա նաև խնդրել է Իրանի նախագահին իր լավագույն մաղթանքները փոխանցել երկրի գերագույն հոգևոր առաջնորդ Ալի Խամենեիին։ 

Փեզեշքիանն իր հերթին շնորհակալություն է հայտնել Ռուսաստանին միջազգային ասպարեզում Իրանին ցուցաբերած աջակցության համար։ 

«Համապարփակ ռազմավարական համաձայնագրի շրջանակներում մենք պարտավորվում ենք իրականացնել բոլոր պայմանավորվածությունները»,- նշել է նա։

Ռազմավարական գործընկերության մասին փաստաթուղթը Մոսկվայի և Թեհրանի միջև ստորագրվել է տարեսկզբին, որով երկու երկրները հաստատել են փոխադարձ հետաքրքրություն ներկայացնող բոլոր ոլորտներում համագործակցությունն ընդլայնելու մտադրությունը։