Երևանում Չեչնիայի քաղաքացու սպանության գործով երկու անձի նկատմամբ հետախուզում է հայտարարվել

Հայաստանի քննչական կոմիտեն հետախուզում է հայտարարել երկու անձի նկատմամբ՝ Չեչնիայի 23-ամյա քաղաքացի Այշաթ Բայմուրադովայի սպանության գործով։ 

«Արմենպրես»-ի հաղորդմամբ՝ այս մասին «Ֆեյսբուք»-ի իր էջում գրել է ՔԿ նախագահի մամուլի քարտուղար Կիմա Ավդալյանը։

Նա նշել է, որ երկու անձի նկատմամբ հարուցվել է հանրային քրեական հետապնդում ՀՀ Քրեական օրենսգրքի 155-րդ հոդվածի 2-րդ մասի 8-րդ կետով՝ մի խումբ անձանց կողմից կատարված սպանություն:

«Վերջիններիս նկատմամբ որպես խափանման միջոց ընտրվել է կալանքը և հանձնարարվել է օրենքով սահմանված կարգով հետախուզում հայտարարել»,– նշել է Ավդալյանը։

Կիմա Ավդալյանը նշել է, որ նախաքննությունը շարունակվում է։

Չեչնիայից Հայաստան տեղափոխված 23-ամյա Այշաթ Բայմուրադովան մի քանի շաբաթ առաջ անհետացել էր Երևանում։ Ոստիկանները նրան մահացած գտել էին մայրաքաղաքի բնակարաններից մեկում։ Ռուսաստանցի ակտիվիստները պնդում են, որ սպանությունը կարող է կապված լինել Չեչնիայում ընտանեկան բռնության թեմայի հետ նրա ակտիվ հրապարակումների և իշխանությունների նկատմամբ քննադատական դիրքորոշման հետ։