Հայաստանի և Ադրբեջանի միջև խաղաղության հաստատումը շրջադարձային իրադարձություն է․ Արարատ Միրզոյան
2 րոպեի ընթերցում
Հայաստանի և Ադրբեջանի միջև խաղաղության հաստատումը շրջադարձային իրադարձություն է։
«Արմենպրես»-ի հաղորդմամբ՝ Ազգային ժողովում 2026 թվականի պետական բյուջեի նախագծի քննարկման ժամանակ այս մասին ասաց ՀՀ արտաքին գործերի նախարար Արարատ Միրզոյանը։
Նախարարը հիշեցրեց, որ օգոստոսի 8-ին Վաշինգտոնում Հայաստանի վարչապետի, Ադրբեջանի նախագահի և ԱՄՆ նախագահի վկայությամբ ստորագրվել է հռչակագիր և նախաստորագրվել է Հայաստանի և Ադրբեջանի միջև խաղաղության համաձայնագիրը։
«Կարող եմ առանց վարանելու օգոստոսի 8-ին տեղի ունեցածը անվանել շրջադարձային՝ բնավ չթերագնահատելով մինչ այդ այս ուղղությամբ կատարված աշխատանքը և բանակցությունները։ Այդ ամբողջը հանգեցրեց օգոստոսի 8-ին, և այն, ինչ տեղի ունեցավ այդ օրը Վաշինգտոնում, շրջադարձային էր և հետագա աշխատանքների համար անկյունաքարային»- ընդգծեց նա։
Միրզոյանի խոսքով՝ փաստաթուղթը նաև ամրագրում է միմյանց ներքին գործերին չմիջամտելու, սահմանների անձեռնմխելիության և տարածաշրջանում համագործակցության սկզբունքները։
«Ես շատ կարևոր եմ համարում այդ տեքստի հանրայնացումը նաև այն առումով, որ բոլորս կհիշենք՝ ինչպիսի մանիպուլյացիաներ էին տարածվում այս պայմանագրի վերաբերյալ՝ Սահմանադրության փոփոխություն, զանգվածային տեղահանումներ և այլն։ Փառք Աստծո, թուղթը հանրային է, հրապարակային է, և տեսնում ենք, որ այդ մանիպուլյացիաներից ոչ մեկը այնտեղ ոչ միայն չկա, այլև հեռավոր ակնարկ անգամ չկա դրանց մասին»,-ընդգծեց նախարարը։