2 րոպեի ընթերցում
Լիտվայի իշխանությունները փակում են Բելառուսի հետ սահմանային բոլոր անցակետերը։ Համապատասխան ծրագիրը քննարկվել է կառավարական հանձնաժողովի նիստում։ «Արմենպրես»-ի փոխանցմամբ, այս մասին լրագրողներին հայտարարել է Լիտվայի վարչապետ Ինգա Ռուգինիենեն։
Նա հայտարարել է, որ սահմանը բաց կլինի միայն դիվանագետների և Բելառուսը լքել ցանկացող ԵՄ քաղաքացիների համար։
Ռուգինիենեն տեղեկացրել է նաև, որ իրենք այսուհետ ոչնչացնելու են Բելառուսի կողմից իրենց երկրի օդային տարածք ապօրինաբար մտնող ցանկացած մաքսանենգ օդապարիկ։
«Այս ճանապարահով մենք ազդանշան ենք ուղարկում Բելառուսին և հայտարարում, որ մեզ մոտ այլևս չենք հանդուրժելու որևէ հիբրիդային հարձակում։ Ձեռնարկելու ենք բոլոր խսիտ միջոցառումները՝ դադարեցնելու նման հարձակումները»,- LRT-ի փոխանցմամբ, հայտարարել է վարչապետը՝ ընդգծելով, որ երկու երկրների միջև սահմանի փակումն անխուսափելի է դարձել իրենց օդային սահմանի խախտման կրկնվող միջադեպերի ու Բելառուսի իշխանությունների՝ դա կանխելուն ուղղված գործողությունների բացակայության պատճառով։
Ինգա Ռուգինիենեն տեղեկացրել է նաև, որ կառավարությունը կարող է քննարկել ՆԱՏՕ-ի 4-րդ հոդվածի համաձայն անվտանգային խորհրդակցություններ սկսելու հարցը։
Բելառուսի տարածքից մաքսանենգ ծխախոտ տեղափոխող օդապարիկների պատճառով նախորդ շաբաթ մի քանի անգամ խախտվել է Վիլնյուսի օդանավակայանի աշխատանքը, ինչի հետևանքով տուժել է մոտ 30 հազար ուղևոր և 170 թռիչք։