Միրզոյանն ադրբեջանցի գործընկերների հետ քննարկել է Բաքվում պահվող հայերի ազատ արձակման հարցը և դրական արդյունքի հույս ունի

Հայաստանի արտաքին գործերի նախարար Արարատ Միրզոյանն ադրբեջանցի գործընկերների հետ քննարկել է Բաքվում պահվող հայ գերիների ազատ արձակման խնդիրը:

«Արմենպրես»-ի փոխանցմամբ՝ այս մասին Միրզոյանը հայտնեց ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենի հետ համատեղ ասուլիսի ընթացքում: 

«Հաստատված խաղաղության պայմաններում էական մի քանի հարցերի շուրջ ձեռք բերված համաձայնությունների պայմաններում մնում են հարցեր, որոնք լուծված չեն, առաջինը՝ Բաքվում պահվող պատանդառված անձանց ազատ արձակման հարցն է: Ամենօրյա աշխատանք է իրականացվում, որը ոչ միշտ է տեսանելի և արդյունավետ: Այս պահին ևս ուզում եմ հույս հայտնել, որ առաջիկայում լավ նորություններ կունենանք: Բառացիորեն երեկ Շարմ Էլ Շեյխում ադրբեջանցի գործընկերների հետ քննարկել ենք նաև այս հարցը: Հուսանք, որ մեր ջանքերը դրական արդյունքով կպսակվեն առաջիկայում»,- ասաց Միրզոյանը: 

Արտաքին գործերի նախարարը նշեց՝ հաշվի առնելով այն հանգամանքը, որ Կարմիր Խաչի միջազգային կազմակերպությունը դադարեցրել է իր գործունեությունն Ադրբեջանում՝ կարևոր է երրորդ երկրների մասնակցությունը հատկապես պատանդառված անձանց վերաբերյալ տեղեկությունների փոխանցման համատեքստում: