Որոշ արաբական և իսլամական երկրներ կոչ են արել բանակցություններ սկսել Գազայում իշխանության փոխանցման վերաբերյալ. ԶԼՄ
2 րոպեի ընթերցում
Որոշ արաբական և իսլամական երկրների արտաքին գործերի նախարարներ կոչ են արել բանակցություններ սկսել Գազայի կառավարումը ՀԱՄԱՍ-ից անցումային կոմիտեին փոխանցելու համար։ «Արմենպրես»-ի հաղորդմամբ՝ այս մասին նշվում է «ՌԻԱ Նովոստի»-ի ստացած համապատասխան հայտարարության մեջ։
«Արտաքին գործերի նախարարները ողջունում են ՀԱՄԱՍ-ի պատրաստակամությունը Գազայի կառավարումը հանձնել անկախ տեխնոկրատներից կազմված Պաղեստինյան ինքնավարության անցումային կոմիտեին։ Նրանք ընդգծել են առաջարկի իրականացման մեխանիզմի շուրջ համաձայնության հասնելու և դրա բոլոր ասպեկտները քննարկելու համար անհապաղ բանակցություններ սկսելու անհրաժեշտությունը», - ասվում է հայտարարության մեջ։
Նշվում է, որ Թուրքիայի, Հորդանանի, ԱՄԷ-ի, Ինդոնեզիայի, Պակիստանի, Սաուդյան Արաբիայի, Կատարի և Եգիպտոսի արտաքին գործերի նախարարները ողջունել են ԱՄՆ նախագահի կոչը Իսրայելին՝ դադարեցնելու Գազայի վրա հարձակումները, և նշել, որ նման զարգացումը «իրական հնարավորություն է ներկայացնում համապարփակ, կայուն հրադադարի հասնելու և Գազայի բնակիչների համար կարևորագույն մարդասիրական պայմանները բարելավելու համար։
Հոկտեմբերի 4-ին Իսրայելի կառավարության աղբյուրը «ՌԻԱ Նովոստի»-ին հայտնել է, որ ավելի վաղ պաղեստինյան ՀԱՄԱՍ շարժումը հայտարարել է Թրամփի ծրագրի համաձայն՝ բոլոր ողջ իսրայելացի պատանդներին ազատ արձակելու և մահացածների մարմինները հանձնելու պատրաստակամության մասին: