Գերմանիան գրանտային օժանդակություն կտրամադրի Հայաստանին. գործադիրը հավանություն տվեց համաձայնագրին

Կառավարությունը հավանություն տվեց Հայաստանի Հանրապետության կառավարության և Գերմանիայի Դաշնային Հանրապետության կառավարության միջև հայտագրերի փոխանակման ձևով կնքվող «Տեխնիկական համագործակցության մասին» համաձայնագրի ստորագրմանը։

«Արմենպրես»-ի փոխանցմամբ՝ գործադիրի հոկտեմբերի 2-ի նիստում Էկոնոմիկայի նախարար Գևորգ Պապոյանը հայտնեց՝ համաձայնագիրը գրանտային օժանդակություն է ենթադրում, ոչ թե վարկային միջոցներ։

«Համաձայնագրով նախատեսվում է հետևյալ օժանդակությունը․ մասնավոր տնտեսության զարգացում և նախնական և միջին մասնագիտական կրթություն Հայաստանում՝ մինչև վեց միլիոն հարյուր հազար եվրո, կենսակայուն էներգետիկա հանուն Հայաստանի համայնքների կլիմայադիմացկուն զարգացման՝ մինչև վեց միլիոն հարյուր հազար եվրո, Հայաստանի համայնքների ինտեգրված զարգացում՝ մինչև երեք միլիոն հարյուր հազար եվրո, ուսումնասիրությունների և մասնագետների հայաստանյան ֆոնդեր՝ մինչև երեք հարյուր հազար եվրո։ Գերմանիայի կառավարությունը Համաձայնագրի 1-ին կետով ներկայացված՝ վերոնշյալ 4 ծրագրերի իրականացման համար տրամադրում է անձնակազմային և ոչ դրամական ծառայություններ, անհրաժեշտության դեպքում նաև ֆինանսական գումարներ՝ 15 մլն 600 հազար եվրո ընդհանուր արժեքով»,- ասաց Պապոյանը։ 

Էկոնոմիկայի նախարարը նշեց՝ Հայաստանը շահագրգռված է ընդլայնել և ամրապնդել Գերմանիայի հետ համագործակցությունը քաղաքական, առևտրատնտեսական, գիտակրթական, մշակութային և փոխադարձ հետաքրքրություն ներկայացնող այլ ոլորտներում ինչպես երկկողմ, այնպես էլ բազմակողմ ձևաչափով: